Jyl basynan balalar 13 kisi óltirý qylmysyn jasady - mınıstr
ASTANA. QazAqparat - Elimizde 16 myń bala tárbıelenip jatqan 12 myńnan astam qolaısyz otbasy baqylaýǵa alynǵan. Bul týraly búgin Úkimettiń selektorlyq rejimdegi otyrysynda QR Іshki ister mınıstri Qalmuhanbet Qasymov aıtty, dep habarlaıdy QazAqparat tilshisi.
«Erekshe kóńil aýdaratyn problema bul - urlyqtyń aldyn alý. Urlyqtyń kólemi árbir óńirde jalpy qylmystyń 60-70 paıyzyn quraıdy. Olar - páter, mal, avtokólik, uıaly telefon urlyǵy. Bul qylmyspen kúresý jolynda mınıstrlik maqsatty sharalar qabyldaýda. Tıisti baǵdarlama júzege asyrylyp jatyr. Alaıda ákimdikter olardy qoldaýy qajet bolady. Urlyqtyń aldyn alý úshin tek polıtsııany ǵana emes, jergilikti organdardy, uıymdar men mekemelerdi, qoǵamdyq qurylymdardy jáne halyqty jumyldyrý qajet»,- dedi Qalmuhanbet Qasymov.
Sonymen qatar mınıstr jasópirimder qylmysyn aldyn alýda da kemshilikter az emestigin basa aıtty.
«Jyldyń basynan bastap balalar 1900 qylmys jasaǵan. Onyń ishinde 13-i kisi óltirý, 278-i tonaý, 46-sy densaýlyqqa aýyr zııan keltirý,102-si buzaqylyq, 1 myńnan astamy urlyq. Olardyń kóbin mektep, gımnazııa, lıtseı oqýshylary jasaǵan. Sondyqtan mekteptegi ınspektorlar tájirıbesin damytý qajet», - dedi ol.
Onyń dereginshe, qazir mektepterde 2178 ınspektor jumys isteıdi. Olar kún saıyn mektep ákimshiligimen, ata-analar komıtetterimen birlesip jumys atqarady. Qosymsha engizýdi qajet etetin ınspektorlar sany - 1900.
«Olardy árbir mektepke engizbeı balalar arasyndaǵy qylmysty, nashaqorlyqty joıa almaımyz. Balalar arasyndaǵy qylmystyń aldyn alý úshin kámeletke tolmaǵan qylmyskerlerdi arnaıy mektepke jiberý durys bolar edi. Elimiz boıynsha 500-den astam balany arnaıy mektepke jiberý qajet»,- dedi ol.
Mınıstrdiń aıtýynsha, atalǵan balalar áli de turǵylyqty jeri boıynsha bilim alýda.
«Bul árıne, aınalasyndaǵy adamdardyń qarsylyǵyn týdyrady jáne osyndaı balalardyń jazasyz qalýyna jol beredi. Bul ásirese quqyqbuzýshylyq jasaýǵa beıim balalarǵa jaǵymsyz áser etedi. Qazir jergilikti polıtsııanyń profılaktıkalyq baqylaýynda 10 myńnan astam osyndaı jasóspirim bar. Sondaı-aq 16 myń bala tárıbelenip jatqan 12 myńnan astam qolaısyz otbasy baqylaýǵa alynǵan»,- dedi Qalmuhanbet Qasymov.
