Jyl basynan Astanaǵa qansha reseılik keldi

ASTANA. QazAqparat – Jyl basynan beri elordaǵa 29 myńnan astam sheteldik kelgen, onyń ishinde 4 myń reseılik bar. Bul týraly Astana qalasynyń polıtsııa departamenti kóshi-qon qyzmeti basqarmasynyń bastyǵy Arman Baımuhanbet aıtty, dep habarlaıdy QazAqparat tilshisi.

«Jyl basynan beri Astana qalasynda 29 myńnan astam sheteldik azamat tirkelgen, onyń ishinde 4 myńy – Reseı azamattary. Osylaısha, eseptik kezeńde qabyldanǵan sharalar nátıjesinde kóshi-qon zańnamasyn buzǵany úshin 5 myńnan astam sheteldik jaýapkershilikke tartyldy. Elden 867-si shyǵaryldy», - dedi A. Baımuhanbet elorda ákimdiginde ótken brıfıngide.

Sonymen birge sheteldikterdi shaqyrǵan, alaıda olardyń elde bolý erejelerin saqtaýdy qamtamasyz etpegeni úshin 1083 adam ákimshilik jaýapkershilikke tartylǵan.

Ózge elden jumys kúshin tartý jáne paıdalaný erejelerin buzǵany úshin 93 jumys berýshi jaýapqa tartyldy.

«Oǵan qosa, polıtsııa departamentiniń qyzmetkerleri 887 sheteldiktiń jeke basyn anyqtaý úshin qabyldaý-taratý ornyna qamady. Tirkeý jáne qujattandyrý erejelerin buzǵan 2866 azamat ákimshilik jaýapkershilikke tartyldy», - dedi basqarma bastyǵy.

Sondaı-aq kóshi-qon qyzmetkerleri obektilerde aldyn alý sharalaryn júrgizý kezinde, qujattardy qabyldaý men rásimdeý kezinde sheteldik jumys kúshi arasynda sheteldikterdiń quqyqtyq jaǵdaıy boıynsha zańnama talaptary týraly aqparattyq túsindirý jumystaryn turaqty negizde júrgizedi.