Jyl basynan 3 myńnan astam elordalyq dáriger shetelde biliktiligin arttyrdy
NUR-SULTAN. QazAqparat – Jyl basynan 3 myńnan astam elordalyq dáriger shetelde biliktiligin arttyrdy, dep habarlaıdy Nur-Sultan qalalyq densaýlyq saqtaý basqarmasy.
Basqarma málimetterine qaraǵanda, 2017 jyldan bastap olar Nazarbaev Ýnıversıtetimen, «Bolashaq» halyqaralyq baǵdarlamalar ortalyǵymen, Almaty Menedjment ýnıversıtetimen, Astana medıtsınalyq ýnıversıtetimen jáne basqa da jetekshi medıtsınalyq jáne sheteldik ýnıversıtettermen mamandardyń biliktiligin arttyrý maqsatynda yntymaqtastyq ornatqan.
Nur-Sultan qalalyq densaýlyq saqtaý basqarmasy basshysynyń mindetin atqarýshy Álııa Rústemovanyń aıtýynsha, elordada 2016-2019 jyldardy qamtıtyn úsh deńgeıli júıe boıynsha 18 213 medıtsına qyzmetkeri oqytyldy. 2019 jyl aralyǵynda 3 452 adam (onyń 40-y shetelde) onkologııa, akýsherııa jáne gınekologııa, anestezıologııa jáne qarqyndy terapııa, travmatologııa, neırohırýrgııa, otorınolarıngologııa, hırýrgııa boıynsha Shveıtsarııa, Germanııa, Ońtústik Koreıa jáne Izraıldiń jetekshi klınıkalarynda biliktiligin arttyrdy.
Búgingi tańda densaýlyq saqtaýdy tsıfrlandyrý otandyq medıtsınany damytýdyń mańyzdy baǵyttarynyń biri bolyp tabylady.
«IT-medıtsına salasynda kóp jumys jasaldy, endi elordada dárigermen mobıldi qosymsha arqyly nemese «ikomek 109» baılanys ortalyǵy arqyly jazyla alasyz, sonymen qatar barlyq medıtsınalyq uıymdarda 1 mıllıonnan astam medıtsınalyq qujattar tsıfrlandyryldy, atqarylǵan jumystardyń arqasynda ár turǵynǵa elektrondy tólqujat jasaldy. Endi Sizdiń densaýlyǵyńyzdyń kórsetkishterin baqylaýǵa, jeke densaýlyǵyńyz týraly jazba arqyly mamandarmen baılanysýǵa bolady», - deıdi Álııa Rústemova.
Rnyń aıtýynsha, elimizde tuńǵysh ret Nur-Sultan qalasynyń ákimdigi «Adaldyq alańy» jobasymen birlesip medıtsınalyq anyqtamalar men medıtsınalyq kitaptar shyǵarýdyń zańdylyǵyn tekseretin aqparattyq qyzmet iske qosyldy. Endi ony Smart Astana mobıldi qosymshasyna JSN derekterin engizý arqyly qajetti málimetterdi tekserýge bolady jáne bul sharalar jalǵan medıtsınalyq qujattardyń taralýyna jol bermeıdi.
