Jyl basynan 28 adam «Bolashaq» stıpendııasynan aıyryldy
Bul týraly QR Parlamenti Májilisiniń depýtaty Jámılá Nurmanbetova málim etti, dep habarlaıdy QazAqparat.
«Respýblıkalyq komıssııa stıpendııadan aıyrý týraly máseleni turaqty negizde qarastyrady. Bul qupııa emes. 2016 jyldyń ózinde ǵana úlgeriminiń tómendigine, ádette, shetel tilin nashar meńgergendigine baılanysty 28 adam granttan aıyryldy. Árıne, shetel tilin nashar bilý jáne daıyndyqtyń tómendigi bilim alý tsıkilin aıaqtaýǵa múmkindik bermeıdi. Buǵan qosa, biz baǵdarlamaǵa qansha mol qarjynyń memleket tarabynan bólinetindigin bilemiz. Osy oraıda, bul baǵdarlamada nátıjege baǵdarlanǵan qarjylandyrý ustanymy qajet sııaqty», - dedi ol «Bolashak Alumni Reunion Conference and Education Fair - 2016 (BARCEF - 2016)» "Bolashaq" baǵdarlamasynyń III halyqaralyq konferentsııasy barysynda.
Onyń aıtýynsha, bul shyǵyndardy tómendetý úshin úmitkerlerdi shetel tilin bilý talabyn kúsheıtý qajet. Al konkýrstyq protsedýralardyń tıimdiligi men transparenttiligin arttyrý úshin konkýrstyq irikteý júıesin avtomattandyrýdy qarastyrǵan jón.
«Sheteldik joǵary oqý oryndaryna óz betimen túsetinderdiń barlyǵy onlaın-rejimde qujattardy tapsyryp, áńgimelesýden ótýge bolatyndyǵyn, munyń barlyǵy táýelsiz, ashyq, ádil júrgiziletindigin biledi. Bul rette Qazaqstanda da mundaı múmkinshilikter qazirgi ýaqytta bar. Bul atalǵan baǵdarlamaǵa talantty ári maqsatqa umtylǵysh jastarǵa mol múmkindik berer edi», - dedi depýtat.
Nurmanbetovanyń málimetterinshe, qazirgi ýaqytta 8855 stıpendııat oqýyn aıaqtaǵan. Olardyń 2110-y ǵana (25 paıyzy) óńirlerde qyzmet etýde. Al qalǵandarynyń 32 paıyzy Almatyda, 43 paıyzy Astanada jumys isteıdi.
