Jyl bastalǵaly elordada órt saldarynan 5 adam mert boldy
NUR-SULTAN. QazAqparat – 2022 jyl bastalǵaly elordada 5 adam órt saldarynan qaıtys boldy. Bul týraly Nur-Sultan qalasy tótenshe jaǵdaılar departamenti memlekettik órt baqylaý basqarmasynyń basshysy Erkin Otarǵalymuly málim etti, dep habarlaıdy QazAqparat tilshisi.
«Elorda aýmaǵynda órttiń aldyn alý sharasy turaqty túrde ótip turady. Ásirese qystygúni jylytý maýsymy bastalǵanda atalǵan másele ózekti. Sondyqtan qala turǵyndaryn órt qaýipsizdigin túsindirý jumystaryna túsinistikpen qaraýdy suraımyz. 2022 jyl bastalǵaly qala aýmaǵynda 63 órt faktisi tirkeldi. Onyń jartysy turǵyn úı sektoryna tıesili. Eń ókinishtisi bıyl órt saldarynan 5 adam qaıtys boldy», - dedi Erkin Otarǵalymuly elorda ákimdiginde onlaın ótken baspasóz máslıhatynda.
Onyń aıtýynsha, kóbine jeke turǵyn úılerde pesh jaǵý erejeleri saqtalmaıdy. Jáne onyń arty qaıǵyly jaǵdaıǵa alyp kelýi múmkin.
«Adam ólimimen aıaqtalǵan órt oqıǵasynyń ishinde qasaqana órteý faktisi anyqtaldy. Búginde atalǵan fakti boıynsha qylmystyq is qozǵalyp, polıtsııa qyzmeti aınalysyp jatyr. Tergeý amaldary júrýde. Taǵy bir jaıt, aldyńǵy kúni boldy. Turǵyn úıde bolǵan órtti sóndirý barysynda mamandar úı ıesiniń múrdesin tapty. Osy oraıda qala turǵyndarynan órt qaýipsizdigin saqtaýdy suraımyz. Ásirese úıge ot jaǵý kezinde», - deıdi ol.
