Jyl bastalǵaly el aýmaǵynda 340 keliden astam esirtki tárkilendi
Bıylǵy qańtar aıynda elimizdiń birqatar óńirinde ótkizilgen is-sharalar barysynda asa iri mólsherde esirtki quraldaryn saqtaý faktileri boıynsha 90-ǵa jýyq qylmys anyqtaldy, onyń ishinde 59-y esirtkini satý, 28-i saqtaý jáne 6-aýy kontrabanda deregi bolyp tabylady.
Zańsyz aınalymnan alynǵan esirtki quraldarynyń jalpy salmaǵy 340 kelini qurady, onyń ishinde 77 keli gashısh jáne 600 gr geroın bar.
Mysaly, Aqtóbe oblysynda QR ІІM Ulttyq ulanynyń «Búrkit» arnaıy maqsattaǵy jasaǵymen birlesip, uzaq ýaqyt marıhýana jáne gashısh tasymaldaýmen, saqtaýmen jáne ótkizýmen aınalysyp kelgen qylmystyq top ustaldy. Jedel-izdestirý is-sharalarynyń nátıjesinde ustalǵandar minip júrgen avtomashınalardan, olardyń turǵylyqty jerlerinen 180 kelige jýyq marıhýana jáne 10 keli gashısh alyndy.
Al Jambyl jáne Qostanaı oblystarynda polıtseıler oblys turǵyndaryn ustap, olardan 10 jáne 5 keliden gashısh tabylyp, alyndy.
Shyǵys Qazaqstan jáne Jambyl oblystarynda asa iri mólsherde marıhýana saqtaǵany úshin ustalǵan ShQO Alǵabas aýylynyń 49 jastaǵy turǵynynan 25 keli marıhýana, al Shý qalasynyń turǵynynan 10 keli keptirilgen marıhýana men 17,5 keli marıhýana dánderi tabyldy. Jambyl oblysynyń patrýldik polıtsııa batalonynyń qyzmetkerleri Esirtkige qarsy is-qımyl basqarmasynyń qyzmetkerlerimen birlesip, «Batys Eýropa-Batys Qytaı» tas jolynyń 260-shaqyrymynda Almaty qalasynyń turǵyny basqaryp kele jatqan jeńil kólikti toqtatqan. Avtomashınany tintý barysynda onyń júksalǵyshynan 48 keli gashısh salynǵan eki sómke tabyldy.
Budan bólek, Qordaı aýylynyń buryn sotty bolǵan turǵynynan 570 gr geroın tárkilendi. Óskemende aqparattyq resýrstardy qoldaný arqyly sıntetıkalyq esirtkiler satý arnasynyń joly kesildi. Atap aıtqanda 20 jastaǵy oblys ortalyǵynyń turǵyny esirtkini ózi býyp-túıip, belgili bir jerlerge jasyryp ketý arqyly satýmen aınalysqan. Onyń turǵylyqty jeri boıynsha tintý barysynda býyp-túıýge jáne psıhotropty zattardy ólsheýge arnalǵan qurylǵylar, atap aıtqanda elektrondy tarazy, paketter, ólsheýish qasyq jáne ydys, qyzǵylt tústi ızolenta, folga oramy, sondaı-aq salmaǵy 200 gr bolatyn psıhotropty zattar salynǵan 53 paket tabyldy.
Óskemende ustalǵan áıeldiń aıtýynsha, ol psıhotropty zattardy Telegram qosymshasy arqyly taýyp, belgili bir jerge jasyryp ketý jolymen alǵan. Keıin ony oblys ortalyǵynda satýdy kózdegen.
Aıta ketsek, ótken jyly ishki ister organdary 2144 esirtki qylmysyn anyqtady, onyń ishinde ótkizýdiń 1300 faktisi bar. Zańsyz aınalymnan 26 tonnaǵa jýyq esirtki alyndy, sonyń 100 kelisi – esirtkiniń sıntetıkalyq túrleri. 7 esirtki zerthanasy joıyldy, olardan paıdalanýǵa daıyn 65 keliden astam esirtki alyndy. Psıhobelsendi zattardyń jańa túrlerin taratýdyń 80 faktisi tirkeldi, onyń ishinde esirtki jarnamasynyń 138 faktisi bar. Esirtki taratýmen aınalysqan 850-den astam saıt buǵattaldy.
