Jyl aıaǵyna deıin 8 aýylǵa sý qurylǵylary ornatylady - Arhımed Muhambetov
QOSTANAI. QazAqparat - Qostanaı oblysy turǵyndaryn aýyzsýmen qamtamasyz etýge bıýdjetten 6 mlrd teńgege jýyq qarajat bólindi, dep habarlaıdy QazAqparat tilshisi.
Qostanaı oblysynyń ákimi Arhımed Muhambetov turǵyndarǵa esep berý kezdesýinde aıtqandaı, bıyl eldi mekenderdi sýmen jabdyqtaýǵa aıryqsha kóńil bólinedi.
«2017 jyly «Óńirlerdi 2020 jylǵa deıin damytý» baǵdarlamasy boıynsha eldi mekenderdi sýmen qamtýdy jaqsartý úshin 10 nysan qaıta jańǵyrtyldy. Oǵan bıýdjetten 2,7 mlrd teńge bólindi. Olardyń ishinde ótken jyly 3 jańa sý beketi paıdalanýǵa berildi, nátıjesinde 5,7 myń adam turatyn 6 aýylǵa aýyz sý jetkizildi. 2018 jyly sýmen jabdyqtaý jáne sýdy burý obektilerin damytýǵa bıýdjetten 5,6 mlrd teńge bólindi», - dedi oblys basshysy.
Arhımed Muhambetovtiń sózinshe, 2018 jyldyń aıaǵyna deıin 8 aýylǵa sý qurylǵylary ornatylady. Nátıjesinde, 41,5 myń adam taza aýyzsýǵa qol jetkizedi.
«Oblysta ortalyqtandyrylǵan sýmen qamtamasyz etý júıesi 32,2%-dy quraıdy. Bıyl bul kórsetkish ulǵaıýy tıis. Sebebi, «Nurly jol» memlekettik baǵdarlamasy aıasynda 2017 jyly somasy 10,1 mlrd teńgege sýmen jabdyqtaý jáne aǵyn sýlardy burý júıesi jańǵyrtyldy. Barlyǵy 19 nysan qaıta jóndeýden ótti. Buǵan qosa Qostanaı jáne Lısakov qalalaryndaǵy sý toraby, Tobyl sorǵy stantsııasy tolyqtaı retke keldi», - dedi Arhımed Muhambetov.
Sondaı-aq, bıyl Qostanaıda qýattylyǵy táýligine 73 myń tekshe metr bolatyn №5 káriz sorǵy stansasy salyndy. Alǵash ret 500-den astam adam turatyn bir aýyl ortalyqtandyrylǵan sýmen jabdyqtaý júıesine qosyldy.
Foto: perepel-krym.ru
