Jyl aıaǵyna deıin 10 myńnan astam kishkentaı elordalyqtar balabaqshamen qamtylady
ASTANA. Shildeniń 13-i. QazAqparat - Jyl aıaǵyna deıin 10 myńnan astam elordalyq búldirshinder balabaqshalarǵa ornalasatyn bolady, dep habarlady Astana qalasy ákimdiginiń baspasóz qyzmetinen.
Ákimdik taratqan aqparatqa sáıkes, elordada 16 myńǵa jýyq bala mektepke deıingi bilim berý mekemelerimen qamtylǵan. Alaıda 6 jasqa deıingi 35 myńǵa jýyq sábı qala balabaqshalarynda kezekke tirkelgen.
Bul jaǵdaıdy ákimdik usynystan suranystyń birshama basym bolyp otyrǵandyǵymen túsindiredi. Sonymen qatar jyl saıyn Astanada dúnıege keletin sábılerdiń, qalaǵa turaqty qonys aýdarýshylardyń sany da artyp otyr. Aǵymdaǵy jyldyń qańtar-sáýir aılary aralyǵynda elorda perzenthanalarynda 5492 sábı, al ótken 2009 jyly 17 myńǵa jýyq bala dúnıe esigin ashqan.
Elimizde 2015 jylǵa deıin mektep jasyna deıingi balalardyń 70 paıyzyn mektepke deıingi tárbıemen jáne bilimmen qamtý josparlanýda. Almaty men Astana qalalarynda 2010 jyly mektepke deıingi bilim alýǵa memlekettik bilim tapsyrystaryn ornalastyrý úshin respýblıkalyq bıýdjetten 8,5 mlrd. teńge qarastyrylǵan.
Astana ákimdiginiń bastamasymen sáýir aıynan beri jeke balabaqshalarda mektepke deıingi tárbıe jáne oqytýǵa memlekettik tapsyrys ornalastyrylady. Osy joba boıynsha qazirde myń bala tárbıelenip jatsa, qyrkúıekte olardyń qataryna taǵy 1975 búldirshinmen tolyǵa túsedi. Jeke balabaqshalardyń esep shotyna tárbıelep jatqan ár balasy úshin memleket tarapynan aı saıyn 11 896 teńge kóleminde qarjy bólinedi. Qalǵan somany ata-analar óz qaltalarynan tóleıdi. Bundaı qoldaýdy balabaqshalardan oryn alý kezeginde turǵan kez-kelgen otbasy ala alady.
Astana ákimdiginiń josparyna sáıkes, aǵymdaǵy jyldyń sońyna deıin balabaqshalar men shaǵyn ortalyqtarǵa 12304 búldirshin ornalasatyn bolady.
