Júzýden Qazaqstan chempıonatynda Astana komandasy 1-oryn aldy
ASTANA. 29 sáýir. QazAqparat - Astanada 1997 jylǵy týǵandar jáne odan da kishi jasóspirimder arasynda júzýden Qazaqstan chempıonaty aıaqtaldy.
Jarys 25 sáýirde bastalyp, oǵan elimizdiń 13 aımaǵynan úsh júzden astam sportshy qatysty. Bul týraly qalalyq Týrızm, dene tárbıesi jáne sport basqarmasynan málim etti.
Úsh kúndik jarystyń qorytyndysy boıynsha, birinshi oryndy komandalyq básekede 13 altyn medal alǵan Astana komandasy ıelendi. Ekinshi oryn - Qaraǵandy oblysy, al úshinshi oryn Jambyl oblysy komandasynyń qanjyǵasynda
Árqaısysy bes altyn medaldan alǵan elordalyq júzgish Rıat Jumaǵulov pen almatylyq Irına Arhıpova týrnırdiń úzdik sportshylary atandy, dep jazady astana.kz.
Jarystyń ekinshi kúni báseke júzýdiń alty túrinen ótti. Alynǵan medalder sany boıynsha Astana men Almaty komandalary kósh bastady.
Chempıonattyń sońǵy kúnindegi júzýdiń jeti túrinen bolǵan básekede 50 metrge shalqalaı júzýden birinshi oryndy almatylyq Aleksandr Shatskıh pen temirtaýlyq Sergeı Kýchaba ıelendi.
100 metrge erkin stılde júzýden Irına Arhıpova men Rıat Jumaǵulovqa teń keler eshkim bolmady. Batterflıaımen 200 metrge júzýden astanalyq Darıa Malyhına men Aqtóbeden kelgen Astam Baǵandyqovtyń mereıi ústem boldy.
Erkin stılde alys qashyqtyqqa júzýden Astana men Qaraǵandy ókilderi, al 4h100 metr estafetada qyzdar arasyndaǵy aralas stılde Astana komandasy jeńis tuǵyryna kóterildi. Jastar arasynda Jambyl oblysynyń komandasy birinshi oryn aldy.
