Júzýden Azııa chempıonaty: Qazaqstan quramasy 16 medal enshiledi
ASTANA. KAZINFORM — Taılandtyń Bangkok qalasynda ótken jas sanatyndaǵy júzýden Azııa chempıonatynyń qorytyndysy belgili boldy, dep habarlaıdy Sportty damytý dırektsııasynyń baspasóz qyzmeti.
Jarystyń sońǵy kúninde Anatolıı Rýdenkonyń qurmetine Qazaqstannyń ánurany shyrqaldy. Ol 50 metrge brass ádisimen júzýde altyn medal jeńip aldy.
Sondaı-aq Aleksandr Mıronıchev 50 metrge erkin stılde júzýden kúmis júldege ıe bolsa, Danıl Chýjınov 400 metrge keshendi júzýde qola medal enshiledi.
Budan bólek, Qazaqstan quramasy óte joǵary básekede ótken aralas estafetada (mıkst) kúmis júldeni jeńip aldy.
Jalpy, Qazaqstan júzýshileri Azııa chempıonatyn 16 medalmen aıaqtady. Onyń ishinde 6 altyn, 7 kúmis jáne 3 qola júlde bar.
Buǵan deıin Vıktor Drýzın Kanadadaǵy kórkem júzýden sýperfınalda ekinshi júldesine qol jetkizgenin jazdyq.
