Júzýden álem kýbogy: el quramasynyń alty ókili fınalǵa shyqty
ASTANA. KAZINFORM - Astanada júzýden álem kýbogynyń sońǵy kezeńi ótip jatyr. Ekinshi jarys kúnindegi irikteý kezeńiniń qorytyndysy boıynsha Qazaqstan quramasynyń alty ókili fınalǵa joldama aldy. Sonymen qatar eki ulttyq rekord jańartyldy.
QR Ulttyq olımpıadalyq komıtettiń habarlaýynsha, 50 metrge erkin stılde júzýde Gleb Kovalenıa 21,31 sekýnd nátıje kórsetip, Qazaqstan rekordyn 0,04 sekýndqa jaqsartty. Ol keshki sessııada ótetin fınaldyq jarysqa qatysady.
100 metrge batterflıaı ádisimen júzýde birden eki qazaqstandyq fınalǵa shyqty. Ádilbek Mýsın qashyqtyqty 51,42 sekýndta júzip ótse, Maksım Skazobtsov 51,53 sekýnd nátıje kórsetip, irikteý kezeńinde segizinshi oryn aldy.
Aıbat Myrzamuratov 200 metrge brass ádisimen júzýde 2:07,15 sekýnd ýaqyt kórsetip, irikteý kezeńin besinshi orynmen aıaqtady. Egor Popov 100 metrge keshendi júzýde 54,64 sekýnd nátıje kórsetip, fınalǵa joldama aldy. Al Sofıa Spodarenko 100 metrge batterflıaı ádisimen júzýde júldege talasady. Onyń irikteý kezeńindegi nátıjesi - 58,55 sekýnd.
Taǵy bir ulttyq rekordty Ǵalymjan Balabek jańartty. Ol 400 metrge erkin stılde júzýde 3:46,87 sekýnd nátıje kórsetip, bir apta buryn Tashkentte ótken álem kýbogy kezeńinde jasaǵan óz rekordyn jaqsartty.
Fınaldyq jarystar búgin, 16 qazanda, Astana ýaqytymen saǵat 18:00-de bastalady.
Osyǵan deıin qazaqstandyq júzgishter álem kýbogynyń alǵashqy kúninde ulttyq eki rekordty jańartqanyn jazdyq.
