Júzýden 2020 jylǵy álem kýbogy ótpeıtin boldy
NUR-SULTAN. QazAqparat – Halyqaralyq sý sporty túrleri federatsııasy (FINA) júzýden 2020 jylǵy álem kýbogy kezeńderiniń ótpeıtinin jarııalady, dep habarlaıdy QazAqparat Ulttyq Olımpıadalyq komıtetiniń baspasóz qyzmetine silteme jasap.
«Halyqaralyq sý sporty túrleri federatsııasy júzýden 2020 jylǵy álem kýbogi kezeńderiniń ótpeıtinin jarııalady. Sondaı-aq, 2021 jylǵy kýbok kezeńderi merzimin bekitti. 2021 jylǵy álem kýbogy alty kezeńnen turady jáne Tokıodaǵy Olımpıada oıyndarynan soń ótkiziledi. Birinshi jáne ekinshi kezeń Sıngapýr men Tszınan qalalarynda josparlanǵan (naqty merzimi keıin habarlanady), úshinshi kezeń 1-3 qazan kúnderi Berlınde (Germanııa), tórtinshi kezeń 7-9 qazan aralyǵynda Býdapeshtte (Vengrııa), besinshi kezeń 21-23 qazanda Dohada (Katar), altynshy ári fınaldyq kezeń 28-30 qazan kúnderi Qazan qalasynda uıymdastyrylady», delingen Ulttyq Olımpıadalyq komıtetiniń baspasóz habarlamasynda.
Aıta keteıik, 2021 jylǵy álem kýbogi kezeńderi 25 metrlik basseınde ótedi jáne bul álem chempıonatyna irikteý kezeńi bolyp esepteledi. Atalǵan chempıonat 2021 jyldyń 13-18 jeltoqsanynda Ábý-Dabıde (BAÁ) ótedi.
