Júzik, saqına, tıyn: tarıhı jádigerler memleketke qaıtaryldy
ASTANA. KAZINFORM — Qaıtarylǵan jádigerler Ulttyq mýzeıdiń qoryna saltanatty túrde tapsyryldy, dep habarlaıdy «Qaıtarylǵan aktıvterdi basqarý kompanııasy» JShS.
Atalǵan artefaktiler memlekettik menshikke qaıtarylyp, «Qaıtarylǵan aktıvterdi basqarý kompanııasy» JShS-ne berilgen bolatyn. Olardyń tarıhı jáne mádenı quny joǵary bolýy múmkin ekenin eskerip, basqarýshy kompanııa Mádenıet jáne aqparat mınıstrligine júgingen edi.
Buıymdardyń túpnusqalyǵyn anyqtaý men saraptamalyq baǵalaý jasaý úshin artefaktiler Ulttyq mýzeıge jiberildi. Mýzeıdegi sarapshylardyń qorytyndysy boıynsha bul jádigerler temir dáýiriniń erte kezeńi men orta ǵasyrǵa tán joǵary qundylyqqa ıe. Sonyń nátıjesinde elimizdiń zańdary men belgilengen rásimderge sáıkes Qarjy mınıstrliginiń Memlekettik múlik jáne jekeshelendirý komıteti baǵa jetpes qazynany Ulttyq mýzeıdiń mura qoryna berý týraly sheshim qabyldady.
Saraptamalyq qorytyndyǵa sáıkes atalǵan buıymdar b. z. d. VII ǵasyrdan b. z. III ǵasyryna deıingi kezeńine jatady jáne ejelgi kóshpeli halyqtardyń mádenıetine tán, naqty aıtqanda saqtardyń «ań stıli» mánerinde jasalǵan. Qolónerdiń bul túri joǵary kórkemdik sheberlikpen birge saqtardyń grektermen, parsylarmen, qytaılarmen jáne basqa da kórshi halyqtarmen tyǵyz mádenı baılanysta bolǵanyn baıqatyp otyr.
Tapsyrylǵan buıymdardyń ishinde:
— búrkittiń basy beınelengen metall buıym;
— arab jazýy bar júzik;
— múıizdi ań beınelengen (taý ústinde) tik buryshty plastına;
— qanatty arystan, pyraq (qanatty jylqy), qarǵyǵan barys pen buǵynyń músinderi;
— 15 kóne tıyn;
— shıyrshyq túrindegi eki júzik;
— arystannyń basy beınelengen saqına bar.
Tapsyrylǵan jádigerlerdiń jalpy salmaǵy 118 gramnan asady. Erekshe atap óterlik jaıt — buıymdar shekime, bederleý jáne «gravırovka» ádisterimen jasalǵan, bul dala mádenıetiniń stılıstıkalyq erekshelikteri men grek, parsy jáne shyǵys óneriniń yqpalyn kórsetedi.
— QR Bas prokýratýrasy janyndaǵy Aktıvterdi qaıtarý komıteti men Qarjy mınıstrliginiń Memlekettik múlik jáne jekeshelendirý komıtetiniń úılesimdi jumysynyń nátıjesinde ulttyq ıgilik retinde tanylǵan qundy zattar resmı túrde memlekettik menshikke berilip, Ulttyq mýzeı qoryna tabystaldy. Bul Memleket basshysy atap ótken mańyzdy qaǵıdattyń jarqyn dáleli, ıaǵnı árbir qaıtarylǵan aktıv el ıgiligine jumsalýy tıis. Búgin biz osy qaǵıdattyń naqty júzege asqanyna kýá boldyq — bul aktıv halqymyzdyń mádenı murasynyń bir bóligine aınaldy, — dedi «Qaıtarylǵan aktıvterdi basqarý kompanııasy» JShS-niń bas dırektory Qýanyshbek Muqash.
Jaqyn arada osy artefaktiler Ulttyq mýzeıdiń ekspozıtsııalaryna qoıylyp, kópshiliktiń nazaryna usynylady.
Aıta keteıik, búginde qaıtarylǵan aktıvter óńirlerdi damytýǵa jumsalyp jatyr. Atap aıtsaq, Jambyl oblysynda 5 aýyz sý nysanynyń qurylysyna qarjy bólindi.
SQO-da qaıtarylǵan aktıvter esebinen 33 áleýmettik joba iske asyrylyp jatyr.
Sondaı-aq Ulytaý oblysynda bıyl qaıtarylǵan aktıvter esebinen 11 nysan salynady.
Odan bólek Pavlodar aýyldarynda qaıtarylǵan aktıvter esebinen ambýlatorııalar boı kóteredi.