Júzege asyp jatqan baǵdarlamalardy aıaǵyna deıin jetkizý úshin QR Tuńǵysh Prezıdenti ókilettiligin 2020 jylǵa deıin referendým arqyly uzartý kerek - QazUÝ ǵylymı keńesi
ALMATY. 27 jeltoqsan. QazAqparat- /Ádilet Musahaev/ - Júzege asyp jatqan baǵdarlamalardy aıaǵyna deıin jetkizý úshin QR Tuńǵysh Prezıdenti - Elbasy N.Á.Nazarbaevtyń ókilettiligin 2020 jylǵa deıin referendým arqyly uzartý kerek.
Bul jaıynda ál-Farabı atyndaǵy Qazaq ulttyq ýnıversıtetiniń ǵalymdary Ǵylymı keńestiń jıyny barysynda málim etti.
Qazirgi kezde Elbasynyń ókilettiligin uzartý máselesi barlyq jerde qyzý talqylanyp jatqandyǵy belgili. Osy turǵyda búgin ál-Farabı atyndaǵy Qazaq Ulttyq ýnıversıtetiniń oqytýshy-professorlar quramy da ún qatyp, óz pikirlerin usynýda.
Jıyn barysynda qara shańyraqtyń professory Sultan Sartaev dál qazirgi ýaqytta bastalǵan jumystardy aıaǵyna deıin jetkizetin, halyqaralyq qaýymdastyq aldyndaǵy bedelimizdi odan ári arttyratyn Elbasymyz Nursultan Nazarbaevtan ózge kóshbasshy joq ekendigin aıtyp, óz áriptesterin osy bastamaǵa qosylýǵa shaqyratyndyǵyn jetkizdi. Al QazUÝ-dyń jastary atynan sóz alǵan Jastar uıymdary komıtetiniń jetekshisi Nazıra Boldýrýkova stýdent jastardyń bul bastamany tolyq qoldaıtynyn aıtady. «Biz QazUÝ jastary referendýmdy ótkizýge qol jınaý úshin bar múmkindikti paıdalanamyz», - deıdi ol.
Alqaly jıyn barysynda barlyq ǵalymdar men ustazdar kóterilgen bastamany túrli dálelder keltire otyryp talqylap, biraýyzdan qoldaý bildirdi. Sondaı-aq, QazUÝ ǵalymdary óz arasynan arnaıy komıssııa quryp, referendýmdy ótkizýge qajetti qol jınaýǵa sheshim shyǵardy. Al QazUÝ rektory Ǵalymqaıyr Mutanov, jumys toby bizdiń senimimizdi aqtaıdy degen oıyn bildirip, keler jyldyń 6 qańtaryna deıin qol jınaıtyn komıssııa múshelerine sáttilik tiledi.
