Júzden astam kásiporyn Ulttyq jobaǵa qatysýǵa ótinim berdi

ASTANA. KAZINFORM – Premer-mınıstrdiń orynbasary Qanat Bozymbaev Energetıkalyq jáne kommýnaldyq sektorlardy jańǵyrtý jónindegi ulttyq jobany (EKSJ) júzege asyrý boıynsha jobalyq keńse otyrysyn ótkizdi. Bul týraly Úkimettiń baspasóz qyzmeti habarlady. 

Otyrys barysynda jobalyq ofıs bıylǵa arnalǵan josparlardy talqylap, sondaı-aq kelesi jylǵa arnalǵan rásimderdi kelisýge jáne jobalardy qalyptastyrýǵa kiristi.

Búgingi tańda ulttyq jobaǵa qatysýǵa kommýnaldyq kásiporyndar tarapynan joǵary qyzyǵýshylyq baıqalady. Qazirdiń ózinde 101 kásiporyn 439 jobany júzege asyrýǵa ótinim berdi. 34 joba júzege asyrylý satysynda, taǵy 65 joba bastaýǵa daıyn.

Vıtse-premer sáýir-mamyr aılarynda jóndeý jumystarynyń belsendi kezeńine ótýine baılanysty tehnıkalyq operatormen birlesip, Ulttyq jobanyń jospar-kestesiniń oryndalýyna monıtorıng júrgizýdi erekshe baqylaýǵa alýdy tapsyrdy.

– Jospar-kestede jelilerdiń uzyndyǵy parametrlerin jáne ár óńir men ınfraqurylym baǵyty boıynsha qarjylandyrý kólemderin qosa alǵanda, naqty mindetter men kórsetkishter kózdelgen. 2026 jyly jylýmen jabdyqtaýda tozý deńgeıin 48%-ǵa deıin, elektrmen jabdyqtaýda 62%-ǵa deıin, sýmen jabdyqtaýda 37%-ǵa deıin, sý burýda 49%-ǵa deıin tómendetýge qol jetkizýimiz kerek. Sondaı-aq jańa energetıkalyq qýattardy iske qosý qarastyrylǵan. Sondyqtan jospar-kesteni qatań saqtaýǵa tıispiz, - dedi Qanat Bozymbaev.

Vıtse-premer óńir ákimdikterine «qyzyl aımaqta» turǵan kásiporyndarmen jumysty jedeldetýdi tapsyrdy. Qazirgi ýaqytta ulttyq jobaǵa shamamen 54 osyndaı sýbekt kiredi.

Otyrys barysynda kárizdik-tazartý qurylystaryn (KTQ) jańǵyrtýǵa erekshe nazar aýdaryldy. Ulttyq joba aıasynda 36 KTQ qamtylǵan. Olardy qarjylandyrý tetikteri talqylandy: jergilikti atqarýshy organdardyń memlekettik baǵaly qaǵazdary esebinen de, halyqaralyq qarjy ınstıtýttarynyń qarajatyn tartý arqyly da. KTQ jobalaryn júzege asyrý úshin, onyń ishinde Dúnıejúzilik bankpen jumys baǵyttaryn qamtıtyn Jol kartasy bekitiledi. Ákimdikterge, tehnıkalyq jáne qarjylyq operatorlarǵa tıisti tapsyrmalar berildi.

Qanat Bozymbaev EKSJ sheńberinde júzege asyrylatyn barlyq jobalardy ýaqtyly qarjylandyrýdy qamtamasyz etýdiń mańyzdylyǵyn atap ótti. «Báıterek» ulttyq ınvestıtsııalyq holdınginiń derekteri boıynsha jalpy quny 148 mlrd teńge bolatyn 76 joba qaraldy.

Ulttyq joba aıasyndaǵy negizgi kredıtorlardyń biri – Qazaqstannyń Damý banki. Qazirgi ýaqytta banktik saraptamanyń ártúrli kezeńderinde 14 kommýnaldyq kásiporynnyń jalpy jobalyq quny shamamen 375 mlrd teńgeni quraıtyn kredıttik ótinimderi qaralýda. Qarjylandyrýdyń taǵy bir kózi – memlekettik baǵaly qaǵazdar. Ótken jyldyń qorytyndysy boıynsha ulttyq joba sheńberinde 15 jobany júzege asyrý úshin 29,3 mlrd teńgege jergilikti atqarýshy organdardyń memlekettik baǵaly qaǵazdary satyp alyndy. Bıyl osy jobalardy aıaqtaýǵa qosymsha 26 mlrd teńge baǵyttaý josparlanyp otyr.

Ulttyq jobany úzdiksiz júzege asyrýdy qamtamasyz etý úshin Qanat Bozymbaev EKSJ-niń satyp alýlar boıynsha elektrondyq platformasyn jetildirýdi tapsyrdy. Sondaı-aq salalyq vedomstvolarǵa esepke alý qurylǵylaryna qatysty biryńǵaı standarttardy qabyldaýdy jedeldetý jáne bıyl jazda iske qosylady dep josparlanyp otyrǵan Smart Turmys aqparattyq júıesin engizý tapsyryldy.

Budan erterek otandyq taýar óndirýshilerimen jasalǵan kelisimshart kólemi 23%-ǵa artqanyn jazǵanbyz.