Júzden asa almatylyq oqýshy bolashaq ofıtserlerge qonaqqa bardy
ALMATY. KAZINFORM – Radıoelektronıka jáne baılanys áskerı-ınjenerlik ınstıtýty Almaty qalasy Áýezov aýdanynyń oqýdy aıaqtaýshy túlekteri men demalys ortalyqtarynyń tárbıelenýshilerine ashyq esik kúnin ótkizdi. Bul týraly Qorǵanys mınıstrliginiń baspasóz qyzmeti habarlady.
Jas qonaqtar ınstıtýttyń oqý-materıaldyq bazasymen, kýrsanttardyń oqý jáne turmys jaǵdaılarymen tanysyp, oqý ornyna túsý erejesi men áskerı bilimniń artyqshylyqtary jaıynda jan-jaqty málimet aldy.
Oqýshylar kafedralar men oqý aýdıtorııalaryn, trenajer keshenderin aralap, joǵary tehnologııalyq áskerlerdiń bolashaq ofıtserleri qalaı daıarlanatynyn kózderimen kórdi.
Olardy, ásirese, ushqyshsyz basqarylatyn apparattarmen jumys isteý qatty qyzyqtyrdy. Balalar ushýlardy qyzyǵa baqylap, zamanaýı tehnologııalardyń áskerı salada qalaı qoldanylatynyn bildi.
Instıtýttyń kýrsanttary oqýshylarǵa ózderiniń oqý tájirıbelerin kórsetip, tańdaǵan mamandyqtary, ǵylymı jáne sporttyq jetistikteri, kazarmadaǵy ómiri týraly aıtyp berdi. Tikeleı áńgime barysynda oqýshylar áskerı formadaǵy qatańdyqtyń artynda eńbek, tártip jáne Otanǵa qyzmet etýge daıyndyq jatqanyn túsindi.
Ekskýrsııa barysynda áskerı-sporttyq estafeta uıymdastyrylyp, onyń qorytyndysy boıynsha qatysýshylarǵa alǵys hattar men syılyqtar tabys etildi.
Іs-shara jyly jáne sımvoldyq atmosferada aıaqtaldy. Qatysýshylar naǵyz sarbaz botqasynan dám tatty.
– Áskerı ınstıtýttyń atmosferasy erekshe áser qaldyrdy. Munda mańyzdy ári suranysqa ıe mamandyqtarǵa úıretedi. Osynda oqý qyzyqty ári abyroıly ekenine senimdimin. Ekskýrsııadan keıin dál osy oqý ornyna túskim keldi, - dedi Ǵ. Músirepov atyndaǵy №86 mektep-gımnazııasynyń oqýshysy Jalǵas Ábdikárim.
Osyndaı kezdesýler áskerı joǵary oqý ornynda ıgi dástúrge aınalǵan. Turaqty túrde ótetin ashyq esik kúnderi men úgit-nasıhat sharalary bolashaq talapkerlerge áskerı oqý ornynyń ómirimen tanysyp, suraqtaryna jaýap alyp, mamandyqty sanaly túrde tańdaýǵa múmkindik beredi.