Júzdegen qazaqstandyq «Nur Otan» partııasyna qabyldandy
Astanadaǵy saltanatty sharada jańa nurotandyqtarǵa partııa bıletterin partııa Tóraǵasynyń Birinshi orynbasary Máýlen Áshimbaev tapsyrdy. Saltanatty sharany ashqan partııa Tóraǵasynyń Birinshi orynbasary aldymen qatysýshylardy Astana kúnimen quttyqtap, bıyl bul merekeniń máni de, mańyzy da burynǵydan ózgeshe ekenin aıtty.
- Bıyl halqymyzdyń maqtanyshyna aınalǵan arman qalamyz Astananyń negizi qalanǵanyna 20 jyl tolyp otyr. Osy ýaqyt aralyǵynda elordamyz shaǵyn ǵana oblys ortalyǵynan búkil álem moıyndaǵan HHІ ǵasyrdyń ásem de sulý shaharyna aınaldy. Astana - ata-babamyzdyń aqıqatqa aınalǵan armandarynyń jarqyn kórinisi jáne táýelsizdik jyldarynda qol jetkizgen jetistikterimizdiń aıqyn sımvoly. Qazaq eliniń Máńgilik el bolyp qalyptasýynyń myzǵymas nyshany. Osy jetistikterimizdiń barlyǵy Elbasymyzdyń eren eńbegi men syndarly saıasatynyń jemisi. Elbasy Astanany salý arqyly Otanymyzdyń abyroıyn asqaqtatyp, elimizdi álemniń eń bedeldi memleketteriniń qataryna qosty, - dedi Máýlen Áshimbaev.
Sondaı-aq ol partııa qataryna jańadan qabyldanǵan jas nurotandyqtar aldaǵy ýaqytta sol bastamalardy júzege asyrýǵa eleýli úles qosatynyna senim bildirdi.
Búgin nurotandyq atanǵan azamattardyń qatarynda buǵan deıin de partııanyń ár bastamasyn qoldap, onyń iske asyrylýyna óz úlesin qosyp, partııalyq jobalarǵa belsendi qatysyp júrgen jandar bar. Naqty aıtqanda, matematıka, fızıka jáne ınformatıka pánderiniń muǵalimderi arasyndaǵy halyqaralyq kreatıvti olımpıadanyń jeńimpazy, baǵdarlamalaý negizderin oqytatyn kompanııanyń jetekshisi Abzal Orazálıev, erekshe kútimdi qajet etetin balalarǵa arnalǵan aǵylshyn tilin úıretetin kýrstardy uıymdastyrýshy Mansur Qurmanǵalıev, «Bogatyr Komır» kompanııasynyń basshysy, partııanyń «Balalarǵa arnalǵan tegin ІT-synyp» jobasynyń demeýshileriniń biri Rýstam Sansyzbaev, «Qazaqstannyń Agro Innovatsııalyq Korporatsııasy» JShS-nyń bas dırektory, Kókshetaý qalasynda partııalyq jobalardyń júzege asyrylýyna qarjylaı qoldaý kórsetken kásipker Oleg Balybın búgin partııalyq bıletterin aldy.
Partııa múshesi atanǵandar qatarynda «Bolashaq» baǵdarlamasynyń túlekteri de bar. Máselen, «STEM» akademııasynyń negizin qalaýshy, birqatar ІT-synyptarda qoldanylatyn jańa oqytý tehnologııasyn daıyndaǵan Ábýtálip Mútáli, fızıka pániniń muǵalimi, Qyzylorda oblysynyń «Jyl muǵalimi» Abzal Eskendir jáne «Bolashaq» prezıdenttik baǵdarlamasy qaýymdastyǵynyń tóraıymy Laýra Demesinova Astana kúni qarsańynda nurotandyq atanyp otyr.
Birqatar ınnovatorlar men startap jobalardyń avtorlary da búgin partııa qataryna qosyldy. Olardyń qatarynda sozdik.kz belgili qazaq-orys tilderindegi onlaın sózdiktiń avtory Evgenıı Chýrıkov, «Astana Hub» halyqaralyq ІT-startaptar tehnoparkiniń bas dırektory Maǵjan Mádıev, «Ulttyq aqparattyq tehnologııa» AQ basqarma tóraǵasynyń orynbasary Botagóz Qasabek jáne iri otandyq kofehana jelisiniń negizin qalaýshy Aıattıllo Ázimov bar.
Otandyq jastar isinde belsendiligimen kózge túsip júrgen jastar da búgin partııa múshesi atandy. Atap aıtqanda, «Jas ulan» biryńǵaı balalar men jasóspirimder uıymynyń tóraıymy Dınara Sádýaqasova, «Aqjaıyq» Batys Qazaqstan oblystyq telearnasynyń redaktory, oblystyq «Eń úzdik jas jýrnalıst» júldesiniń ıegeri Nına Pavlycheva, «Jas Otan» Jastar qanaty Ortalyq keńesiniń múshesi, «Altyn júrek» syılyǵynyń nomınanty Nııaz Súndetálıev, aqyn, jazýshy, Qazaqstan Jazýshylar odaǵy Semeı qalalyq fılıalynyń dırektory Mereı Qart jáne «Qazaqstan jastarynyń kongresi» uıymynyń atqarýshy dırektory Toqtar Bolysov, M.Qozybaev atyndaǵy Soltústik Qazaqstan memlekettik ýnıversıtetiniń «Serpin-2050» baǵdarlamasy boıynsha tuńǵysh túlegi Sánim Berdimurat, «Eýrazııa bıldıng» JShS-nyń dırektory, «7-20-25» baǵdarlamasyna júzege asyrýǵa belsendi qatysýshy Darhan Sádýaqas jáne «Astana Konvenshn Bıýro» JShS-nyń dırektory, Shveıtsarııadaǵy «Montrıo Bıznes» ýnıversıtetiniń túlegi Sanııar Aıtekenov nurotandyqtardyń sapyna qosyldy.
Aıta keteıik, búginde «Nur Otan» partııasynyń 1 mıllıonnan astam múshesi bar.
