Júzdegen almatylyq Darhan Júnisbekovty eske alý kontsertine jınaldy

ALMATY. QazAqparat - Almatyda Darkhan Juzz sahnalyq atymen belgili otandyq ánshi Darhan Júnisbekovty eske alýǵa arnalǵan kontsert ótip jatyr, dep habarlaıdy QazAqparat tilshisi.

Arbatqa jınalǵan jastar mýzykanttyń barlyq tanymal ánderin oryndaýshylarmen birge oryndaýda.
Kontsertti marqum Darhan Júnisbekovtyń dostary men áriptesteri uıymdastyrdy.
«Biz Darkhan Juzz - diń shyǵarmashylyq joly bastalǵan jerde turmyz. Búgin Alǵys aıtý kúni. Darhandaı uly mýzykant ómir súrgen zamanda ómir súrip jatqanymyz úshin Alla Taǵalaǵa myń da bir shúkirshilik aıtqym keledi. Ol óte jarqyn jigit edi. Men jınalǵandardyń kúlimdegenin qalaımyn. Qaıǵymyzǵa ortaqtasyp, qasymyzdan tabylǵandaryńyzǵa úlken rahmet. Onyń shyǵarmashylyǵy máńgi ómir súretin bolady», – deıdi mýzykanttyń dosy Azat Ábiken.

«õzen» mýzykalyq leıbliniń ókili Aızatýlla Hýseın Darhan Júnisbekov búgin Almatydaǵy Keńsaı-2 zıratyna jerlengenin aıtty.
«Keshe men Astanada boldym, onda kontsert uıymdastyryldy. Men úshin Astananyń orny bólek, sebebi Darhan ekeýmiz sonda kezdestik. Mine, keshegi kontsert dál Darhan ekeýmiz onyń ánderin alǵash oryndaǵan jerde ótti. Búgin biz ony aqtyq saparǵa shyǵaryp saldyq. Ol qazir Batyrdyń (Batyrhan Shúkenov – red.) jáne ómirden ótken elimizdiń kóptegen tanymal óner qaıratkerleri men ańyz adamdardyń janynda jatyr. Ol Keńsaı-2 musylman zıratyna jerlendi», - dedi ol.
Eske salaıyq tanymal ánshi Darkhan Juzz 24 aqpan kúni Taılandta jol apatynan qaza tapqan bolatyn.
Keıin Júzdegen almatylyq qoldaryna gúl shoqtary men sham ustap Arbatta qazaqstandyq mýzykanttyń ánderin oryndap, sol arqyly onyń rýhyna taǵzym etti.
Sondaı- aq ánshi Darkhan Juzz-diń aıaqtalmaǵan albomy jaryqqa shyǵatyny belgili boldy.