Júz sarbaz, bir maqsat: Jibek Joly arnasyndaǵy jańa joba
ASTANA. KAZINFORM — Jibek Joly telearnasyndaǵy «100 Sarbaz» áskerı-patrıottyq realıtı-jobasynyń jańa maýsymy bastaldy. Elimizdiń ár óńirinen iriktelgen 100 áskerı qyzmetshi on komandaǵa bólinip, tózimdilik, tártip pen komandalyq rýhty talap etetin túrli synaqtan ótedi. «BÚGІN. Live» realıtı-shoýynda joba qatysýshylary Nurdáýlet Esdáýletov pen Aqnıet Dúısen túsirilim jumystary týraly aıtyp berdi.
2024 jyly efırge shyqqan «100 Sarbaz» jobasy qazaq televızııasyndaǵy áskerı salaǵa arnalǵan alǵashqy iri realıtı-jobalardyń biri boldy. Bıyl kórermenge onyń jańa maýsymy usynylyp otyr.
Tańǵy 5-te oıaný, táýlik boıy kamera baqylaýynda bolý, sýyqqa tótep berý jáne kúrdeli tapsyrmalardy oryndaý — qatysýshylardy kútip turǵan synaqtardyń bir bóligi ǵana. Jobanyń alǵashqy shyǵarylymynda-aq sarbazdardyń qatań tártipke baǵynýǵa jáne jańa jaǵdaıǵa beıimdelýge tıis ekeni baıqaldy.
— Efırdi barlyq jaqyndarym asyǵa kútti. Kórgennen keıin synaqtardyń shynymen qıyn ekenin aıtyp jatyr. Bul áli bastamasy, alda taǵy 8 efır bar. Realıtı-shoý bolǵandyqtan, ózimizge de qyzyq boldy. Árıne, qıyndyqtar kezdesti. Kórermender de onyń ońaı emes ekenin óz kózimen kórgen shyǵar, — dedi Nurdáýlet Esdáýletov.
Jobadaǵy 100 sarbaz elimizdiń ár óńirinen kelgen áskerı qyzmetshiler arasynan iriktelip alynǵan. Aqnıet Dúısen Aqkól qalasyndaǵy áskerı bólimde kadrlyq ofıtser bolyp qyzmet etedi. Al Nurdáýlet Esdáýletov Astanadaǵy № 5 mamandandyrylǵan órt sóndirý bóliminde bólim komandıri bolyp jumys isteıdi.
— Alǵashqy kúni-aq bizdi dalaǵa alyp keldi. Sýyq dýsh qabyldadyq, dalada tamaq iship, shatyrda uıyqtadyq. Áskerden kelgenime on jyldan asyp ketti, sondyqtan bul jaǵdaıǵa úırenisýdiń ózi kúrdeli boldy. Degenmen, bárimiz jaqsy aralasyp, on kúnniń ishinde baýyrdaı bolyp kettik. Óte tartysty joba boldy, — deıdi Aqnıet Dúısen.
Qatysýshylar kún saıyn dene shynyqtyryp, tańǵy saǵat beste oıanǵan. Tapsyrmalar aldyn ala aıtylmaǵandyqtan, ár komanda ózderin qandaı synaq kútip turǵanyn bilmegen.
— Naǵyz áskerı kún tártibi boldy deýge bolady. On adamnan turatyn komandalardy ár jaqqa alyp ketip, qandaı tapsyrma beriletinin aldyn ala aıtpady. Jobada sý da, taý da, tas ta, órt te boldy. Munyń bári qyzyqty ótti. Menińshe, bul joba jastardyń áskerı mamandyqqa qyzyǵýshylyǵyn arttyrady, — dedi joba qatysýshylary.
Eske sala ketsek, bul joly qatysýshylar tabıǵat aıasynda — Býrabaıda synalǵan. Jobaǵa elimizdiń túrli áskerı qurylymdarynyń sarbazdary qatysty. Olardyń qatarynda desantshylar, qutqarýshylar, arnaıy jasaq ókilderi men áskerı kadetter bar. Sonymen birge tanymal sportshylar, akterler men blogerlerden quralǵan komanda da óz kúshin synady.
