«Júz kúngi jumystyń júıeliligi - iskerliktiń belgisi» - BAQ-qa sholý
***
«Mine, taǵy bir jyldy tarıh qoınaýyna qattap, kezektisine kirisip te kettik. Al osy bir aralyqta árkim ótken jylǵa ólshemmen qarap, saralap-salmaqtap, tarazylaıtyn ádeti. Biz de bul jyl nesimen este qaldy, qandaı jumystar atqarylyp, ne tyndyryldy degendeı saýaldarǵa kóz júgirtip kórgen edik, ulý jyly ultymyz úshin jalpy jaman bolmaǵanyn ańǵardyq. ıAǵnı, qaı salada bolmasyn jetistigi mol atalmysh jyl el esinde aıryqsha saqtalary sózsiz. Eski jyldyń erekshe eske túsetin oqıǵalarynyń biri - el Úkimetiniń aýysýy. Bir aıta keterligi, sol jańa Úkimettiń qyzmetke kiriskenine týra jańa jylda júz kún toldy», - dep jazady «Egemen Qazaqstan» gazeti búgingi sanyndaǵy «Júz kúngi jumystyń júıeliligi - iskerliktiń belgisi» degen taqyryptaǵy maqalasynda. Basylymnyń atap ótýinshe, jańa Úkimet jumysqa kirisken alǵashqy kezeńnen-aq el úshin asa mańyzdy qujat eldegi barlyq baǵdarlamalardy júzege asyrýǵa baǵyttalǵan jańa úshjyldyq bıýdjet jobasyn qabyldap, ony barynsha tıimdi iske asyrýǵa kúsh saldy. S.Ahmetovtiń Parlamentte ótkizgen alǵashqy Úkimet saǵaty da osy bıýdjet jobasyn bekitýmen dóp keldi. Onda ol depýtattardyń bıýdjet qarjysyn tıimdi paıdalaný, bıýdjettik josparlaý men bıýdjetaralyq qatynastardy jetildirý, bıýdjetti sapaly oryndaýdaǵy ákimshiler jaýapkershiligin arttyrý, bıýdjet qarjysyn paıdalanýdaǵy jarııalylyqty qamtamasyz etý, áleýmettik salany nyǵaıtý, taǵy basqa da máselelerge qatysty saýaldaryna jan-jaqty jaýap berdi.
Osy basylymnyń jazýynsha, Petropavl qalasynda 20-ǵa jýyq mektepke deıingi tárbıe mekemesi bar dep eseptelse, bireýi ǵana taza qazaq tilindegi shańyraq-tyn. Jýyrda eki qabatty jańa balabaqsha boı kóterip, tálim-tárbıe tek memlekettik tilde júrgiziletin boldy. Onyń ashylý saltanatynda sóılegen sózinde aımaq basshysy Serik Bilálov Prezıdent Nursultan Nazarbaev elimizdiń jańa saıası baǵytyn dáıektep bergen Joldaýynda saýattylyǵy joǵary elge aınalý mindetin qoıǵanyn, bul oraıda bilim berý salasyndaǵy basymdyqtardyń tyń ádisteri belgilengenin, «Balapan» baǵdarlamasyn júzege asyrýdyń nátıjesinde búgingi kúni 3-6 jas aralyǵyndaǵy búldirshinderdiń 86 paıyzy balabaqshalarǵa baratynyn, 2015 jylǵa taman tolyq qamtylatynyn jetkizdi. Maqala «Memlekettik tildegi balabaqsha» degen taqyryppen berilgen.
***
«Jańa jyl túninde peard jarylýynan Almatyda 15 adam, 7 eresek pen 8 bala zardap shekti», - dep jazady «Kazahstanskaıa pravda» «Postradalı ot petard» degen taqyryptaǵy maqalasynda. Qalalyq TJM baspasóz qyzmetiniń bas mamany Aınur Abdýllınanyń sózine qaraǵanda, ótken jylmen salystyrǵanda Jańa jyl túninde pırotehnıkadan zardap shekkenderdiń sany eki esege qysqarǵan. «Mereke qarsańynda bizdiń departamenttiń qyzmetkerleri halyqpen pırotehnıkalyq buıymdardy paıdalaný jáne órt qaýipsizdigi erejelerin saqtaý boıynsha túsindirý jumystaryn júrgizdi», - dedi ol.
***
«Izvestııa-Kazahstan» gazetiniń búgingi sanynda jaryq kórgen «Somnıtelnaıa slava» degen taqyryptaǵy maqalada «Ádil sóz» Sóz bostandyǵyn qorǵaý halyqaralyq qory óziniń joǵalýyn ózi uıymdastyrǵan jýrnalıst Toqbergen Ábıevti qara tizimge engizgendigi jaıynda aıtylǵan. 2012 jyldyń 20 jeltoqsany kúni Toqbergen Ábıevtiń joǵalyp ketkendigi týraly dabyldy Qazaqstannyń jýrnalıster qaýymdastyǵy, otandyq jáne halyqaralyq quqyq qorǵaý uıymdary soqty. Astana polıtsııasy mereke aldyndaǵy júktemege qaramastan ony izdep-tabýǵa óziniń myqty degen qyzmetkerlerin saldy. Degenmen, 31 jeltoqsan kúni Ábıev tabyldy. Belgili bolǵandaı, ol óziniń qyzmetine nazar aýdartý úshin ózin-ózi «urlaǵan». Onyń otbasy, dostary jáne áriptesteri ózderin qoıarǵa jer tappaı júrgende ol din aman jaldamaly páterde jasyrynyp otyrǵan. «Ádil sóz» Sóz bostandyǵyn qorǵaý qory Ábıevtiń bul qylyǵyn etıkalyq jáne kásibılik turǵydan jol berýge bolmaıtyn áreket dep eseptep, ony «qara tizimge» engizdi.
