Júıkem tynysh bolsyn deseńiz...
ASTANA. QazAqparat - Adamnyń júıke júıesiniń tozýy onyń búkil aǵzasyna teris áserin tıgizedi. Kúızelister, shekten tys shamdaný tutas aǵzanyń álsireýine ákeledi. Sonyń saldarynan túrli aýrýlar týyndaıdy. Qazirgi tańda dárigerler júıke júıesin nyǵaıtatyn bes negizgi taǵamdar tobyn aıqyndady, dep jazady segodnya.ua.
Birinshi topqa V1 dárýmeni kiredi, ol qaraqumyq jarmasynda, suly botqasynda, shoshqa etterinde jáne qara nanda kóp. Ekinshi toptaǵy V2 dárýmeni júıke júıesi úshin aqyl-oı eńbeginen kóp kúsh túskende taptyrmas em eken. Oǵan burshaq tuqymdastary, saýmaldyq, syra ashytqysy, órikter, jumyrtqa ónimderi jatady. Bul ónimderdi paıdalanbaıtyn adamnyń kóńil-kúıi tómendep, basy aýyryp, ózin álsiz sezinip júretin kórinedi. Al myna qym-qýyt zamanda kúızelisten arylý úshin jáne emotsııalyq turǵydan jeńildikti seziný úshin V12 dárýmenin paıdalanǵan jón, deıdi dárigerler. Ol teńiz ónimderiniń, júrek, baýyr, búırek sııaqty mal ónimderiniń jáne jumyrtqanyń aqýyzynda mol. Bul ónimderdi tutyný mıdyń ıntellektýaldyq jumysyn qalpyna keltirip, adamnyń este saqtaý qabiletin jaqsartady eken. Sondaı-aq olardyń kóńil-kúıge de oń áseri bar. Atalmysh taǵamdardy tutynbasańyz, sizdiń Altsgeımer aýrýyna shaldyǵýyńyz qaýpi artady eken. Sút jáne barlyq sút ónimderi kaltsııdiń kózi bolyp tabylady. Al aǵzada bul mıneral jetispegen jaǵdaıda adam mazasyzdanyp, ashýshańdyqqa boı aldyrady. Júıkeniń qalypty qyzmetin qamtamasyz etý úshin qajetti paıdaly taǵamdardyń sońǵy tobyn quramynda ıody bar as ónimderi quraıdy. Oǵan barlyq teńiz ónimderi, atap aıtqanda, teńiz qyryqqabaty men teńiz balyqtary jatady.
