Júıeli túrde para alyp kelgen «Kókshetaý» stantsııasynyń basshysyna 18,7 mln teńge aıyppul salyndy

NUR-SULTAN. QazAqparat - Aqmola oblysynda «Qazaqstan Temir Joly» ulttyq kompanııasynyń Aqmola jol jáne júk tasymaly bólimshesine qarasty «Kókshetaý» stantsııasynyń basshysyna qatysty sotqa deıingi tergeý aıaqtaldy, dep habarlaıdy QazAqparat tilshisi.

QR Memlekettik qyzmet isteri jáne sybaılas jemqorlyqqa qarsy is-qımyl agenttigi Aqmola oblysy boıynsha departamentiniń habarlaýynsha, stantsııa basshysy vagondardy kedergisiz jetkizgeni jáne jedel jibergeni úshin kásipkerlerden júıeli negizde para alǵan. Sondaı-aq, qyzmettik ókilettigin asyra paıdalanyp, bos turǵan vagondar úshin debıtorlyq bereshek somasyn azaıtqan.

«Aǵymdaǵy jyldyń 13 maýsymynda Kókshetaý qalalyq sotynyń úkimimen kúdikti sybaılas jemqorlyq jasaǵany úshin kináli dep tanylyp, 18,7 mln teńge kóleminde aıyppul salyndy. Laýazymdy tulǵa ómir boıy memlekettik qyzmette jáne jergilikti ózin-ózi basqarý organdarynda qyzmet atqarý quqyǵynan aıyryldy. Sot úkiminiń zańdy kúshine engen kúninen bastap 3 aı ishinde aıyppul tóleý merzimi belgilendi», - delingen departament taratqan aqparatta.

Ulttyq bıýro ókilderiniń aıtýynsha, sottalýshy atalmysh aıyppuldy tólemegen jaǵdaıda jaza bas bostandyǵynan aıyrý jazasymen almastyrylady.