Júıelerdi biriktirip, tólemderdi ońtaılandyrý mıllıardtaǵan teńge únemdeıdi
ASTANA. KAZINFORM – Memleket basshysynyń tapsyrmasy aıasynda memlekettik organdardyń aqparattyq júıeleriniń 200-den astam komponenti ıntegratsııalanady. Bul týraly Premer-Mınıstr Oljas Bektenov AMANAT partııasy fraktsııasynyń keńeıtilgen otyrysynda aıtty.
«Osy maqsatta meniń basshylyǵymmen Tsıfrlyq shtab quryldy. Bizdiń mindetimiz – Prezıdent tapsyrmalaryn sapaly ári jedel oryndaý. Shtabtyń sheshimimen memlekettik organdardyń aqparattyq júıelerin ıntegratsııalaýǵa arnalǵan keshendi jospar bekitildi. Ol 200-den astam komponentti qamtıdy», – dedi Úkimet basshysy.
Integratsııalaý jumystary shyǵyndardy azaıtýǵa, júıelerdiń fýnktsıonaldyq qaıtalanýyn boldyrmaýǵa jáne statıstıkalyq aıyrmashylyqtardy sheshýge múmkindik beredi. Memleket basshysy jappaı tsıfrlandyrýdy jáne jasandy ıntellektini jedel engizýdi basym baǵyt retinde aıqyndaǵan bolatyn.
Úkimet basshysynyń aıtýynsha, jasandy ıntellekt quraldaryna arnalǵan derekter massıvterimen jumys isteý reglamenti jáne ony iske asyrý jospary bekitildi. Sonymen qatar ulttyq aqparattyq qaýipsizdikti kúsheıtý sharalary aıasynda barlyq memlekettik organdardy qazaqstandyq Aitu messendjerine kóshirý jumystary júrgizilýde. Azamattarǵa shottaǵy qarajat jetkiliksiz bolǵan jaǵdaıda da eGov, eOtinish, Aitu jáne basqa da servısterge qol jetkizý múmkindigi qamtamasyz etildi.
Premer-Mınıstr áleýmettik tólemderdi tsıfrlandyrý men protsesterdi ońtaılandyrý bıýdjet shyǵyndaryn aıtarlyqtaı qysqartqanyn atap ótti.
«Qazir Eńbek mınıstrligi áleýmettik shyǵyndar boıynsha memleketke túsetin júktemeni ońtaılandyrýǵa baǵyttalǵan jumystardy belsendi júrgizip jatyr. Bul shyn máninde kómekke muqtaj adamdarǵa kórsetiletin járdemdi qysqartý emes, barlyq parametr boıynsha muqtajdar sanatyna jatpaıtyn adamdardy áleýmettik qoldaý júıesinen shyǵarý týraly bolyp otyr. Tsıfrlyq otbasy kartasynyń kómegimen halyqty alty sanatqa bóldik. Altynshy sanatqa úıi, avtokóligi, turaqty jumysy bar, biraq memleketten áleýmettik tólemder alyp otyrǵan adamdar kiredi», – dedi Oljas Bektenov.
Onyń aıtýynsha, pılottyq rejımde Qaraǵandy men Shymkentte engizilgen skorıng júıesi keıin barlyq óńirlerge taratylady.
«Osy jumystyń nátıjesinde 2024 jáne 2025 jyldary biz 280 mlrd teńgeden astam, shamamen 290 mlrd teńgeni únemdedik. Bul negizinen jergilikti bıýdjetterdiń qarajaty. Kelesi jyly taǵy keminde 165 mlrd teńgeni únemdeı alamyz. Keı óńirlerde bir bala bir kúnde 10 úıirmege qatysqan degen jalǵan derekter bolǵany belgili. Qazir biz osy salada tártip ornatyp jatqandyqtan, osyndaı únemdeýge qol jetkizip otyrmyz», – dedi Premer-Mınıstr.
Oljas Bektenov Úkimettiń bul baǵyttaǵy jumystardy jalǵastyratynyn atap ótti.
Aıta keteıik, Premer-Mınıstr tsıfrlandyrýdyń jumysshylarǵa jańa múmkindikter beretinin jetkizdi.