Júsipov Álem chempıonatyndaǵy ónerin jeńispen bastady
ASTANA. QazAqparat - Búgin Germanııanyń Gambýrg qalasynda ótip jatqan Bokstan álem chempıonatynda ekinshi bolyp sharshy alańǵa Abylaıhan Júsipov shyqty, dep habarlaıdy QazAqparat.
69 kelige deıingi salmaq dárejesindegi aıqasta onyń qarsylasy mysyrlyq boksshy Valıd Saıd Mohamed boldy. Abaı mektebiniń tárbıelenýshisi óziniń sheberligin kórsete aldy. Tóreshilerdiń biraýyzdy sheshimimen jeńis qazaqstandyq sportshyǵa berildi, dep habarlaıdy Sports.kz .
Abylaıhan endi 1/8 fınalda ıtalııalyq Vınchentso Mandjakapremen kezdesedi. Jekpe-jek 28 tamyz kúni ótedi.
Buǵan deıin óziniń alǵashqy kezdesýin 60 kelige deıingi salmaq dárejesindegi Ádilet Qurmetov ótkizgen bolatyn . Tóreshiler jeńisti qarsylasy - grýzın Otar Eranosıanǵa berdi.
Búgin qazaqstandyq taǵy bir sportshymyz 52 keli salmaq dárejesindegi (1/16 fınal) Azamat Isaqulov jekpe-jek ótkizedi. Ol Ońtústik Koreıa boksshysy Inkıý Kımmen judyryqtasady.
Eske salaıyq , 25 tamyz kúni sharshy alańǵa alǵashqy bolyp shyqqan 49 kelige deıingi salmaqtaǵy boksshymyz Erjan Jomart gvatemalalyq qarsylasy Maıkl Tele Teleni qapy qaldyrsa, 56 kelide synǵa túsken Qaırat Eralıev te birinshi aıqasyn jeńispen bastady. Eralıev birinshi jekpe-jeginde meksıkalyq Krıstofer Flores Maganany aıqyn basymdyqpen utty.
Álem chempıonatynda úshinshi bolyp rıngke shyqqan 75 kelilik boksshymyz Ábilhan Amanqul da qarsylasy - avstralııalyq Kempbell Somervıldi aıqyn basymdyqpen jeńgen bolatyn.
Sondaı-aq 64 kelige deıingi salmaqtaǵy Bekdáýlet Ibragımov baıraqty dodadaǵy jarysyn jeńispen bastady.
Eske salaıyq, 25 tamyz kúni bastalǵan Bokstan álem chempıonaty toǵyz kúnge jalǵasyp, 2 qyrkúıek kúni márege jetedi. Qazaqstan quramasy barlyq 10 salmaq dárejesinde synǵa túsetin bolady. Olar - 49 keli salmaqta Erjan Jomart, 52 keli salmaqta Azamat Isaqulov, 56 keli salmaqta Qaırat Eralıev, 60 kelide Ádilet Qurmetov, 64 kelide Bekdáýlet Ibragımov, 69 kelide Abylaıhan Júsipov, 75 kelide Ábilhan Amanqul, 81 kelide Erik Áljanov, 91 kelide Vasılıı Levıt jáne asa aýyr salmaqta Qamshybek Qońqabaev.
Jarysqa álemniń 85 elinen 280 boksshy kelgen.
