Júsipbek Aımaýytovtyń jerlengen jeri tabyldy
ASTANA. QazAqparat - HH ǵasyrdyń basynda ulttyq ádebıettiń barlyq janrynda birdeı ónimdi eńbek etken qalamgerlerdiń biri Júsipbek Aımaýytovtyń jerlengen jeri tabyldy. Bul jaıynda Pavlodar oblysy ákiminiń baspasóz hatshysy Asqar Jaldınov óziniń áleýmettik jelidegi paraqshasynda habarlady.
«Federaldyq qaýipsizdik qyzmetinen jaýap keldi. Bizdiń Júsipbek atamyz atylǵannan keıin Vagankovskoe zıratynda jerlenipti. Buıyrtsa, bıyl sol jerge baryp taqtasha ornatyp, árýaǵyna Quran baǵyshtap qaıtsaq degen josparymyz bar», - dep jazdy A.Jaldınov.
Jan-jaqty óner ıesi, segiz qyrly bir syrly daryn, romanshy, dramatýrg, aqyn, aýdarmashy, zertteýshi Júsipbek Aımaýytov 1889 jyly (keı derekterde 1890 jyly) qazirgi Pavlodar oblysy Baıanaýyl aýdany Qyzyltaý atyrabynda týǵan. Jas kúninen Júsipbek birge týǵan baýyrlary Ahmet, Jaqypbek sekildi arabsha hat taný, oqý ústine, aǵash sheberligi, temir ustalyǵy ónerin qatar úırenedi. On bes-on alty jasynda ózi umtylyp, úı ishiniń ruqsatynsyz Pavlodarǵa qashyp baryp, oryssha-qazaqsha eki synypty mektepke túsedi. Bir jaǵynan bala oqytyp, qarajat taba júrip, oqýyn 1914 jyly bitiredi de, Semeıdegi oqytýshylar semınarııasyna túsedi. Ony 1918 jyly aıaqtaıdy. Qazaqstan Keńesteriniń quryltaıyna delegat, Oqý kommısarıatynyń kollegııa múshesi bolý, «Qazaq tili» gazetin óńdeý, «Aq jol» gazetinde isteý, Shymkenttegi pedagogıkalyq tehnıkýmynyń dırektorlyǵy - mine, munyń bári Júsipbek Aımaýytovtyń jańa ómirdi ornyqtyrý jolyndaǵy kúres jolyn, ómir belesterin kórsetedi. 1929 jyly bastalǵan zobalań kezinde qarmaqqa ilingen Júsipbek Aımaýytov 1931 jyly atylǵan. Astan-kesteń aýyr, biraq erekshe qýatty da qyzyq, áleýmettik tóńkerister, uly ózgerister zamanynda ómir súrgen Júsipbek Aımaýytov óziniń osy qysqa ǵumyrynda artyna asa baı, baǵaly ádebı, ǵylymı mura qaldyryp úlgirdi. Ol, V. Shekspır, V. Gıýgo, G. Mopassan, A.S.Pýshkın, N.V. Gogol, L.N.Tolstoı shyǵarmalaryn, birqatar ǵylymı eńbekterdi aýdardy, pedagogıka, psıhologııa, metodıka, tárbıe týraly zertteýler týdyrdy; ádebı, estetıka, syn salasyna aralasty: san qıly problemalyq maqalalar jazdy. Sol sııaqty «Kúnikeıdiń jazyǵy», «Aqbilek» romandary, san alýan pesalary - kúrdeli talanttyń qazaq ádebıeti tarıhyndaǵy ólmeıtin orny bar shyǵarmalar.
