Júsipbek Aımaýytovtyń «Tez ólmen» óleńi ǵalymdardyń qolyna qalaı tústi
«Memleket basshysy Qasym-Jomart Toqaev Túrkistan qalasynda ótken Ulttyq quryltaıda Saıası qýǵyn-súrgin qurbandaryn tolyq aqtaý jónindegi memlekettik komıssııa ǵalymdarynyń qupııa qujattardy zertteý kezinde Júsipbek Aımaýytov jazǵan delingen shyǵarmanyń tabylǵanyn aıtqan bolatyn.
Endi Júsipbek Aımaýytovqa telinip otyrǵan «Tez ólmen» óleńiniń ǵalymdardyń qolyna qalaı túskeni jaıynda az-kem baıandaıyq», - dep jazdy Erlan Qarın facebook-tegi paraqshasynda.
Onyń aıtýynsha, arhıv qujattarynda bul týyndyny Júsipbek Aımaýytuly abaqtyda tergeýde jatqan kezinde jazǵan dep kórsetiledi. Ol QR Іshki ister mınıstrligine qarasty Qaraǵandy qalalyq polıtsııa departamentiniń arnaıy memlekettik arhıv qoryndaǵy № 01093 isinde saqtalǵan. Bul is jáne basqa da kóptegen qujattar jaqynda Memlekettik komıssııa aıasynda qupııasyzdandyrylǵan edi.
Shyǵarma tóte jazýmen jazylǵan. Sonymen qatar, orys tilindegi qysqasha túsindirmesi de bar.
«Týyndy týraly Qaraǵandy oblystyq OGPÝ basqarmasyna qarasty Arnaıy bóliminiń basshysy L.V. Krýchının jasaǵan tergeý hattamasynda da aıtylady. Ol muny alashordashyl azamat, Karlagta qamaýda otyrǵan Damolla Bıtileýovti tergegen kezinde anyqtaǵan. Tergeý barysynda Damolla Bıtileýov Ahmet Baıtursynuly, Mirjaqyp Dýlatov jáne basqa da alashordashylarmen qarym-qatynasy jaıynda aıta otyryp, Ýaıda Baıbekovpen ekeýi Júsipbek Aımaýytovtyń óleńi jaıynda áńgimeleskenin tilge tıek etken. Abaqtyda jazylǵan shyǵarma sottalýshylar arasynda tarap ketken. Damolla Bıtileýov óleńdi Ýaıda Baıbekovke aıtyp beredi. Óz kezeginde Ý. Baıbekov ony qaǵazǵa túsiredi.
1933 jyldyń 14 maýsymynda Ismaǵambet Mákishov pen Nurǵalı Kadalenkony tergeý isi boıynsha aıyptalýshylardy bettestirip, hattama toltyrylady. Sol hattamada I. Mákishov N. Kadalenkonyń ótinýimen Damolla Bıtileýovten shyǵarmany alyp, ony Kadalenkoǵa bergenin aıtqan. Bıtileýov týyndyny Karlagta otyrǵan sottalýshylardyń arasynda nasıhattap júrgen», - dep jazady Memlekettik keńesshi.
Aıta keterligi, shyǵarma úsh bólikten turady. Qazirdiń ózinde ǵalymdar óleńniń mazmunyn 20-jyldardaǵy dástúrli poezııanyń stıline jýyqtaıtynyn aıtyp otyr.
Sondyqtan týyndyǵa fılologııalyq saraptama jasaý úshin Prezıdent Arhıviniń janynan Ádebıet jáne óner ınstıtýtynyń mamandary men aımaýytovtanýshy ǵalymdardan quralǵan arnaıy top jasaqtaldy. Ǵalymdar tolyq zerttep, ortaq tujyrymǵa kelgennen keıin onyń qorytyndysy qosymsha jarııalanatyn bolady.
Eske sala ketsek, Túrkistanda ótken Ulttyq quryltaıda Prezıdent Qasym-Jomart Toqaev jaqynda tabylǵan Júsipbek Aımaýytulynyń tyń shyǵarmasyna qatysty pikir bildirgen edi.
