Júsipbek Aımaýytov atyndaǵy teatr kórermenmen qaıta qaýyshty
PAVLODAR. QazAqparat - Júsipbek Aımaýytov atyndaǵy Pavlodar oblystyq qazaq mýzyka-drama teatry araǵa bir jyl salyp kórermenmen qaıta qaýyshty, dep habarlaıdy QazAqparat Pavlodarnews.kz saıtyna silteme jasap.
32-shi teatr maýsymy Muhtar Áýezovtiń «Abaı joly» roman-epopeıasynyń jelisinde jazylǵan «Erte oıandym, oılandym» qoıylymymen ashyldy.
Qoıylymda Jas Abaı beınesin, teatrdyń jas akteri Nurjan Ábilasan somdady. Qoıylym rejııseri Ádilet Aqanov.
- Araǵa bir jyl ýaqyt salyp kórermenmen saǵynysa qaýyshyp turmyz. Jas Abaı beınesi men úshin óte jaýapty. Olaı deıtinim, Abaı bolmysyn, ishki tebirenisin sahnadan bere alýǵa tıispin. Sol úshin óleńderin oqyp, qara sózderin paraqtap uzaq zerttedim. Bir shetinen tolqyp ta turmyn. Sebebi, halyqty saǵynyp qaldyq, - dedi Nurjan Ábilasan.
Jalpy teatr ujymy 8 naýryz – Halyqaralyq áıelder kúnine oraı, 7 naýryzda Q.Júnisovtiń «Ǵashyqtar hıkaıasyn» usynady. Sondaı-aq 24, 25 naýryzda Sh.Aıtmatovtyń «Jámıla» dramasynyń premerasyn qoıýdy kózdep otyr.
