«Jýsan» jobasyna «Tumardyń» arnaıy syılyǵy berildi
ASTANA. QazAqparat - Sırııaǵa ketken qazaqstandyqtardy qaıtarý týraly "Jýsan" jobasyna «Tumar» ulttyq televızııalyq báıgesiniń arnaıy syılyǵy berildi, dep habarlaıdy «QazAqparat» HAA tilshisi.
Arnaıy syılyq jóninde QR Aqparat jáne qoǵamdyq damý mınıstri Dáýren Abaev málimdedi.
Baıqaý úmitkerlerin qaraýda túsip qalǵan bir jobany erekshe atap ótkim keledi. Onyń da taqyryby jyldyń úzdik serıaly atanǵan "Qyzyl deńgeıge" (KTK telearnasy) uqsas. Qazaqta "Ár qazaq - meniń jalǵyzym" degen qanatty sóz bar. Bul da memlekettiń óz azamattaryn qıyn jaǵdaıda qaldyrmaıtynyn bildirip turǵandaı. Búgin "Tumar" báıgesiniń arnaıy syılyǵyn Qazaqstan telekorporatsııasyna "Jýsan" jobasy úshin bergim keledi. Bul joba kásibı jýrnalıstıkanyń bar ekenin jáne esh nárseden qoryqpaıtynymyzdy kórsetti", - dedi Dáýren Abaev.
Mınıstr arnaıy "Tumar" syılyǵyn "Qazaqstan" telekorporatsııasynyń basshysy Erlan Qarınge tabystady.
Eske sala ketsek, 9 qańtarda Elbasy Nursultan Nazarbaev Sırııadan Qazaqstan azamattaryn evakýatsııalaý boıynsha gýmanıtarlyq operatsııaǵa baılanysty málimdeme jasady. Onda Memleket basshysy quqyq qorǵaý organdary men Syrtqy ister mınıstrligi júrgizgen gýmanıtarlyq shara nátıjesinde Sırııadan 47 Qazaqstan azamatynyń, sonyń ishinde 30 balanyń elimizge qaıtarylǵanyn atap ótti.
Astanada televızııa salasyndaǵy úzdikterdi anyqtaıtyn "Tumar" ulttyq televızııalyq báıgesi bıyl úshinshi ret uıymdastyrylyp otyr. Uıymdastyrýshylardyń aıtýynsha, báıgege 2019 jyldyń 22 aqpanynan 10 naýryzyna deıin 300-den astam ótinim kelip túsken.
Bıylǵy baıqaý 9 nomınatsııa boıynsha ótkiziledi. Úmitkerler, «Úzdik televızııalyq serıal», «Úzdik áleýmettik joba», «Úzdik derekti fılm», «Úzdik aqparattyq-taldaý baǵdarlamasy», «Televızııalyq maýsymnyń úzdik oqıǵasy», «Úzdik oıyn-saýyq jobasy», «Úzdik óńirlik telejoba», «Úzdik telejýrnalıst», «Úzdik telejúrgizýshisi» atalymdarynda baq synaıdy.
