«Jýsan» operatsııasy: Elge oralǵandardyń basym bóligi radıkaldy kózqarastan bas tartty
ASTANA. KAZINFORM – «Jýsan» arnaıy gýmanıtarlyq operatsııasy aıasynda oralǵan azamattardyń basym bóligi radıkaldy kózqarastarynan bas tartyp, qoǵamǵa beıimdelip jatyr. Bul týraly Mádenıet jáne aqparat mınıstrliginiń Din isteri komıtetinen málim etti.
- 2019 jyldan 2023 jylǵa deıingi kezeńde quzyrly organdardyń sheteldik áriptestermen tyǵyz ózara is-qımyly nátıjesinde «Jýsan» arnaıy gýmanıtarlyq operatsııasy sátti júzege asyryldy. Mádenıet jáne aqparat mınıstrliginiń, quqyq qorǵaý jáne jergilikti atqarýshy organdardyń, sondaı-aq din mamandarynyń birlesken kúsh-jigeriniń arqasynda qazirgi tańda repatrıanttardyń basym bóligi radıkaldy kózqarastarynan bas tartty. Kóbisi Qazaqstannyń dástúrli ıslam baǵytyn ustanady. Olardyń arasynda qoǵamdaǵy radıkaldy dinı jáne ekstremıstik kózqarastar men ıdeıalardy qabyldamaý ahýaly qalyptasqan, - dedi komıtetten agenttik saýalyna oraı.
Vedomstvo málimetinshe, óńirlerde áıelderdiń áleýmettik-ekonomıkalyq beıimdelýine erekshe kóńil bólinip otyr. Jergilikti atqarýshy organdar tarapynan olardy beıbit ómirge beıimdeý jáne qoǵamǵa kiriktirý maqsatynda túrli qoldaý sharalary uıymdastyrylylady. Atap aıtqanda, áıelder úshin oqytý kýrstary ótkizilip, jumysqa ornalasýǵa kómek kórsetiledi. Kásipkerlik qyzmetti bastaýǵa granttar berilip, jekelegen otbasylarǵa turǵyn úı máselesin sheshýge qoldaý kórsetiledi.
- Sonymen qatar qoǵamdyq qorlar, demeýshiler men túrli uıymdar tarapynan muqtaj otbasylarǵa kıim-keshek pen azyq-túlik túrinde kómek kórsetiledi. Meshitter de qaıyrymdylyq sharalaryna qatysyp keledi. Dinı merekeler kezinde, sonyń ishinde Qurban aıtta azyq-túlik taratylyp, repatrıanttardyń balalaryna oqý jylyna daıyndalýǵa kómek kórsetiledi. Atap aıtqanda, balalar mektep formasy men keńse taýarlarymen qamtamasyz etiledi, - delingen jaýapta.
Komıtet bul sharalar repatrıanttardyń beıbit ómirge beıimdelýine jáne qoǵamǵa kirigýine baǵyttalǵanyn atap ótti.
Buǵan deıin elimizde dinı ilim beretin qandaı oqý oryndary bar ekenin jazǵan edik.
