«Jýsan» operatsııasymen elge oralǵan 5 ana jańa mamandyq ıgerdi - Atyraý oblysy

NUR-SULTAN-ATYRAÝ. QazAqparat - Atyraý oblysynda «Jýsan» operatsııasynyń arqasynda elge oralǵan 5 ana jańa mamandyq ıgerdi. Bul týraly búgin Ortalyq kommýnıkatsııalar qyzmetindegi baspasóz máslıhatynda Atyraý oblysynyń ákimi Nurlan Noǵaev aıtty, dep habarlaıdy QazAqparat tilshisi.

«Memlekettik-jekeshelik áriptestik aıasynda jalpy quny 39 mlrd 500 mln teńgeniń 8 jobasy júzege asyrylyp jatyr. Bul kóshelerdi jaryqtandyrý, abattandyrý máseleleri jáne týberkýlezdi erte anyqtaýǵa múmkindik beretin jobalar. Qazirgi ýaqytta konkýrs satysynda 9 nysan bar. Jeke kásipkerler 9 balabaqsha salmaq»,- dedi ol.

Noǵaevtyń aıtýynsha, oblysta «Іsker ana» jobasy júzege asyrylyp jatyr. Joba aıasynda qatysýshylar kásipkerlik, psıhologııa, marketıng boıynsha maman-trenerlerdiń eki aptalyq kýrstarynda oqıdy. Joba bastalǵaly beri 901 adam oqyp shyǵyp, qosymsha mamandyq ıgerdi.

«Onyń 665-i Atyraý qalasynan bolsa, qalǵandardy aýdandarda turatyn azamatshalar. Sonyń ishinde 5 ana »Jýsan« operatsııasy arqyly Sırııadan elge qaıtarylǵan», - dedi oblys basshysy.