«Jýsan» operatsııasy: Elge oralǵan áıelderdiń 96% radıkaldy kózqarastan bas tartty

NUR-SULTAN. QazAqparat – «Jýsan» operatsııasy arqyly elge oralǵan áıelderdiń 96%-y radıkaldy kózqarastan bas tartty. Bul týraly QR Aqparat jáne qoǵamdyq damý mınıstrligi din isteri komıtetiniń tóraǵasy Erjan Núkejanov aıtyp berdi, dep habarlaıdy QazAqparat tilshisi.

«Destrýktıvti dinı aǵymdy ustanýshylarmen josparly jumystar jalǵasýda. Bul baǵyttaǵy jumystardy júıeli júrgizý úshin «Aqnıet» ońaltý ortalyǵynyń bilikti mamandary tartylýda. Respýblıka boıynsha dinı radıkaldy ıdeologııadan zardap shekkenderdi teologııalyq-psıhologııalyq ońaltýdyń biryńǵaı tetikteri engizilgen. Sonymen birge, QMDB ımamdary da kómek berýde», - dedi E. Núkejanov Ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, «Jýsan» gýmanıtarlyq operatsııasy arqyly elge oralǵan 188 áıeldi ońaltý jáne qaıta áleýmettendirý jumystaryna erekshe kóńil bólinýde.

«Búginde júrgizilgen jumys nátıjesinde olardyń 95%-y (188 áıeldiń 181-i) radıkaldy dinı kózqarastan bas tartty, al keıbireýleri tolyǵymen zaıyrly ómir saltyna kóshti», - deıdi E. Núkejanov.

Aıta keteıik, bıyl birinshi jartyjyldyqta 84 myńnan astam adam áleýmettik jelidegi radıkaldy toptardan shyǵaryldy. Dinı ekstremızm men terrorızm ıdeıalaryn nasıhattaıtyn 80 myńnan astam materıal joıylyp, 300-den astamy buǵattalǵan.

6 qazanda Nur-Sultan qalasynda Álemdik jáne dástúrli dinder kóshbasshylarynyń sezi ótedi.