«Jýsan» operatsııasy: AQSh-ta Qazaqstan tájirıbesi talqylandy

NUR-SULTAN. QazAqparat - 2021 jyldyń 8 qańtary – «Atlantıkalyq keńes» atty bedeldi amerıkalyq taldaý ortalyǵy Qazaqstannyń azamattardy soǵys aımaqtarynan qaıtarý jáne olardy qoǵamǵa qaıta ıntegratsııalaý tájirıbesin talqylaýǵa arnalǵan onlaın konferentsııa ótkizdi.

Bul týraly QazAqparat QR Syrtqy ister mınıstrliginiń Telegram kanalyna silteme jasap habarlaıdy.

Іs-sharaǵa Qazaqstan Respýblıkasy Syrtqy ister mınıstriniń orynbasary Erjan Ashyqbaev, Memlekettik departamenttiń Zorlyq-zombylyq ekstremızmen kúres jónindegi úılestirýshisiniń orynbasary Krıstofer Harnısh jáne AQSh-tyń jetekshi sarapshylary qatysty.

E. Ashyqbaev vebınarǵa qatysýshylardy soǵys aımaqtarynan otandastardy qaıtarý boıynsha júrgizilgen operatsııanyń barlyq kezeńderimen, sondaı-aq olardy beıbit qoǵamǵa qaıta ıntegratsııalaý boıynsha júrgizilip jatqan jumystarmen qysqasha tanystyrdy. Qazaqstandyq dıplomat «Jýsan» operatsııasy birinshi kezekte radıkaldy ıdeologııanyń qurbany bolǵan áıelder men balalardy qorǵaýǵa baǵyttalǵan gýmanıtarlyq mıssııa ekenin atap ótti. Bul QR Prezıdenti Qasym-Jomart Toqaevtyń «Halyq únine qulaq asatyn memleket» tujyrymdamasyn, sondaı-aq Tuńǵysh Prezıdent - Elbasy Nursultan Nazarbaevtyń terrorızmge qarsy kúres salasyndaǵy mańyzdy halyqaralyq bastamalaryn naqty iske asyrýdyń jarqyn mysaly.

AQSh Memlekettik departamentiniń ókilderi men amerıkalyq sarapshylar adamdardy soǵys aımaqtarynan qaıtarý jáne qaıta ıntegratsııalaý máselesinde Qazaqstannyń álemdik kóshbasshylyǵyn atap ótti. Olar qazaqstandyq tájirıbeni «úlgi tutatyn» jáne osy óte kúrdeli problemany sheshýge jaýapty tásildiń kórinisi dep málimdedi.

Sonymen qatar, Qazaqstan Úkimetiniń ashyqtyǵy, yntymaqtastyqqa jáne dıalog ornatýǵa daıyndyǵy aıryqsha atap kórsetildi. Brıfıngke qatysýshylar Qazaqstan álemdik qoǵamdastyqtyń terrorızmge qarsy kúsh-jigerine jáne BUU Qaýipsizdik Keńesiniń tıisti qararlaryn engizýge aıtarlyqtaı úles qosyp otyrǵanyn atap ótti.