Jýsan ıisinen shabyt alǵan mańǵystaýlyq bıolog dıffýzor jasap júr
AQTAÝ. KAZINFORM – Mańǵystaýlyq bıolog Saıasat Kemalova jýsannan hosh ıisti dıffýzor ázirleýdi qolǵa aldy. Ol týǵan ólkeniń tabıǵı ósimdikterin zerttep, olardyń ereksheligin óskeleń urpaqqa tanytýdy maqsat etedi. Bul týraly Mańǵystaý oblystyq qoǵamdyq kommýnıkatsııa ortalyǵy habarlady.
Joba avtorynyń aıtýynsha, jýsannan túrli ónim ázirleý ıdeıasy ustazdyq qyzmetinen bastalǵan. Ol mektepte jumys istegen jyldary oqýshylardyń bos ýaqytyn tıimdi uıymdastyrý úshin qosymsha bilim berý úıirmelerin júrgizgen. Saı-Ótes aýylyndaǵy Ótes orta mektebiniń janyndaǵy jylyjaıǵa jetekshilik etip, onda 70-80-ge jýyq ósimdik túrin ósirgen.
Bıolog ósimdikterdiń dárilik jáne kosmetıkalyq qasıetterin zerttep, oqýshylarǵa teorııalyq bilimmen qatar praktıkalyq sabaqtar ótkizgen. Keıin Mańǵystaý oblystyq Oqýshylar saraıynda dırektordyń oqý isi jónindegi orynbasary bolyp jumys istegen kezde de balalarmen jumys isteýdi toqtatpaǵan.
Osylaısha, jýsannan túrli ónim ázirleý ıdeıasy oqýshylarǵa arnalǵan úıirme sabaqtarynyń bir baǵytyna aınalǵan. Joba barysynda balalar ósimdikter týraly ádebıetter men ǵylymı materıaldardy oqyp, olardyń shyǵý tarıhyn, qasıetteri men qoldanylý erekshelikterin zertteıdi. Máselen, jýsan taqyryby arqyly qazaq halqynyń tarıhy, ádebıeti, ańyzdary jáne týǵan jerge degen saǵynyshy da túsindiriledi.
Saıasat Kemalova jýsannyń qazaq halqynyń tanymynda týǵan jerdiń sımvolyna aınalǵanyn atap ótti. Sondyqtan onyń maqsaty tek ósimdikterdiń qasıetin tanystyrýmen shektelmeıdi. Bıolog balalardy ózdiginen izdenýge, zertteýge jáne tájirıbe jasaýǵa baýlýdy kózdeıdi.
— Qosymsha bilim berýdiń artyqshylyǵy — bala úıirmeni óz qyzyǵýshylyǵyna qaraı tańdaıdy. Sol arqyly óziniń qabiletin baıqap, bolashaq kásibine baǵyt alýy múmkin. Eń bastysy, bala kórip, ustap, tájirıbe jasaý arqyly úırengenin eshqashan umytpaıdy, — deıdi Saıasat Kemalova.
Joba avtory aldaǵy ýaqytta ósimdikterdiń ózge de túrlerin zerttep, olardy tájirıbelik sabaqtar men jańa ónimder ázirleýde paıdalanýdy josparlap otyr.
Buǵan deıin Astanada Creative Aimaq jobasy aıasynda Qazaq Creative Hub alańynda uıymdastyrylǵan «Mańǵystaý: Tamyr. Talǵam. Kreatıv» atty eki kúndik jármeńkeniń qorytyndysynda 33 mln 260 myń teńgeniń ónimi satylǵanyn jazǵan edik.
