Jurttyń kópshiligi bolashaǵyn qazaq tilimen baılanystyrady - R. Mınýlın

Bul jaıynda búgin "Let´s spek qazaqsha" jastar keńesiniń úılestirýshisi Rýslan Mınýlın Almatyda ótip jatqan «Internettegi qazaq tilin damytý joldary» taqyrybyndaǵy dóńgelek ústel barysynda aıtty.

Baıandamasyn bastan-aıaq qazaq tilinde júrgizgen Rýslan jıynǵa qatysýshylardyń úlken yqylasyna bólenip, óziniń qazaq tiline degen qurmetiniń zor ekendigin bildirdi.

R.Mınýlın "Let´s spek qazaqsha" dep atalatyn jobalarynyń qazaqsha úırengisi kelgen jandardy ózdiginen úırenýine kómektesetindigin aıtyp ótti. "Qazirgi kúni qazaq tiliniń róli men mańyzy óte zor. Men qazaq tilin úırengisi keletinderden "tildi ne úshin úırengiń keledi?" dep suraǵanymda, adamdardyń kópshiligi bolashaǵyn osy tilmen baılanystyratyndyǵyn jetkizdi. Sonymen qatar keıbir adamdar qazaq tilin úırenýge bos ýaqytym joq, jaqsy oqýlyqtar joq degendeı sebepterin aıtyp jatady. Degenmen, adamda yqylas bolsa ýaqyt ta, múmkindik te tabylady", -deıdi úılestirýshi.

Sondaı-aq ol kóptegen dostarynyń Facebook, M-agent syndy áleýmettik jelilerde otyratyndyǵyn jáne qazaq tilin úıretýdi sol jerde qolǵa alsaq óte tıimdi bolar edi degen oıyn jetkizdi. "Mysaly, maqsatty top quryp kóp ýaqytyn áleýmettik saıttarda ótkizetin keńselik qyzmetkerlerge arnap sol saıttarda arnaıy til úıretetin better ashyp, ol jerde qyzyqty suraqtardy qazaqsha talqylaıtyn bolsaq, onda qazaq tilin úırenemin deýshilerge óte jaqsy, ári qyzyqty bolar edi", -deıdi R.Mınýlın.

Mundaı ister óz nátıjesin beretindigin aıta kele ol qazaq tilin tartymdy, ári jaǵymdy, túsinikti ádemi qalypta jetkizetin bolsaq, ol jurtshylyqtyń úlken suranysyna ıe bolar edi degen paıymda. "Eger men bireýdi qazaq tilin úıren dep májbúrleıtin bolsam, sózime kóp eshkim qulaq asa qoımaýy múmkin, al ony jaqsy jolmen jetkizsem nátıjesi basqasha bolar edi", -deıdi ol.

Jobanyń úılestirýshisi sonymen birge eldiń ár aımaǵyndaǵy adamdarǵa ıneternettiń qoljetimdiligin tolyqtaı qamtamasyz etý kerektigin de alǵa tartty.