Jurtty jumysqa turǵyzamyn dep aldap kelgen túrkistandyq áıel ustaldy
TÚRKІSTAN. QazAqparat - Túrkistan oblysynda turǵyndardy jumysqa turǵyzamyn dep jarty mıllıon teńgege deıin aqsha alǵan áıel ustaldy. Qazirdiń ózinde kúdiktiniń úsh ret alaıaqtyq jasaǵany anyqtalyp otyr, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń habarlaýynsha, jábirlenýshiler kúdikti kelinshekke 200 myńnan 500 myń teńgege deıin aqsha bergen. Ýáde boıynsha aldanǵandardy medıtsınalyq mekemege jumysqa turǵyzbaq bolǵan. Alaıda ýádesinde turmaı, aqshany alǵan mezette izin sýytyp kelipti.
Keles aýdandyq ІІB polıtseıleri jedel izdestirý sharalary barysynda seziktini qolǵa túsirip, onyń Shymkent qalasynyń turǵyny ekenin anyqtady. Qazirgi tańda oǵan qatysty sotqa deıingi tergeý amaldary júrgizilip, qylmystyq is sotqa joldandy.
