Jurtty 35 mln teńgege aldap ketken alaıaq ustaldy
ALMATY. QazAqparat – Almatyda 33 jastaǵy alaıaq halyqty aldap, 35 mln teńgeni qoldy etken, dep habarlaıdy QazAqparat tilshisi.
Qalalyq PD tergeý bólimi kúdiktige qatysty birneshe derekpen qylmystyq is qozǵaǵan.
«33 jastaǵy Túrkistan oblysynyń týmasy 2018 jyldan beri birneshe tanysyn JOO túsýge, ǵylym doktory dárejesin alýǵa kómektesemin dep aldap kelgen. Basqalarǵa ol memlekettik baǵdarlama boıynsha arzan jer alyp bere alamyn dep ýáde bergen. Bul adamdardan ol jalpy eseppen 35 mln teńge alǵan. Olardyń ázirge úsheýi polıtsııaǵa shaǵymdandy», - dedi Almaly aýdandyq PB basshysy Esen Ysqaqov.
Qazirgi tańda ol PD ýaqytsha oqshaýlaý ornyna qamaldy. QR QK 190-babynyń 3-bólimimen qylmystyq is qozǵaldy.
