Jurttan jınaǵan jumyrtqalarmen taýyq fermasyn ashypty
ASTANA. QazAqparat - Túrkııanyń Bartyn aýdanynyń turǵyny, jas kásipker ózi turatyn qala men onyń aınalasyndaǵy aýyldardy jeke-jeke aralap shyǵyp jınaǵan jumyrtqalardan 6 myń balapan shyǵaryp, taýyq fermasyn qurdy. Bul týraly aqparatty Túrkııanyń Anadoly agenttigi habarlady.
Atalǵan aýdannyń Aryt aýylynda dúnıege kelgen Muhammed Kusshy esimdi jas jigit orta mektepti támamdaǵannan soń kúnkóris qamymen Ystambul qalasyna barady. Megapolıstiń restorandarynyń birinde daıashy bolyp jumys jasaǵanymen, onyń turmysy jaqsaryp kete qoımaıdy. Sonan soń týǵan aýylyna qaıta oralyp, mal sharýashylyǵymen aınalysýǵa bel býady. Aldymen naryqty zerttegen jas kásipker osydan eki jyl buryn Aýyl sharýashylyǵy mınıstrliginiń arnaıy qoldaý baǵdarlamasy aıasynda 17 myń sharshy metr aýdandy alatyn alqapta taýyq fermasyn ashady. Kórshi aýyldardan jınap ákelgen jumyrtqalarynan 6 myń balapan shyǵarady. Tabıǵı túrde shyǵarylǵan balapandary ósip jetilgen Muhammed Qusshy qazir táýligine 5 myń jumyrtqa alady eken.
