Jurtymyzdy el tynyshtyǵyn baǵalaı bilýge, saqtaı bilýge shaqyramyn — Qasym-Jomart Toqaev

ASTANA. KAZINFORM — Halqymyz tatý bolsa, ishki ahýal turaqty bolsa, barlyq qıyndyqty jeńemiz. Bul týraly Memleket basshysy Qasym-Jomart Toqaev málim etti. 

— Uly Abaı «Birińdi qazaq, biriń dos, kórmeseń istiń bári bos» dep beker aıtpaǵan. Mádenıet pen ádep, tárbıe men tálim árbir azamattyń, árbir otbasynyń ózinen bastalýy qajet. Qazirgi bulyńǵyr zamanda eń basty mindet — elimizdiń egemendigin, jerimizdiń tutastyǵyn nyǵaıtý. Ol úshin birligimiz bekem bolýy kerek. Halqymyz tatý bolsa, ishki ahýal turaqty bolsa, biz barlyq qıyndyqty jeńemiz. Kez kelgen kedergiden ótemiz. Sondyqtan jurtymyzdy el tynyshtyǵyn baǵalaı bilýge, saqtaı bilýge shaqyramyn, — dedi Qasym-Jomart Toqaev Qazaqstan halqyna Joldaýynda.

Memleket basshysy málim etkendeı, árbir azamat memleketshil, otanshyl bolýy kerek.

— Búginde patrıotızm degen sózdiń sıpaty, mazmuny ózgerip jatyr. Buryn bul uǵym negizinen dástúrli qundylyqtarmen ólshenetin, til, mádenıet, rýhanııat máselesi ulttyq múddeniń ózegi retinde sanalatyn. Árıne, bul durys, árqaısysy ult bolmysynyń arqaýy. Ony bizden eshkim tartyp almaıdy, oǵan alańdaýǵa esh negiz joq, — dep tolyqtyrdy Prezıdent.

Buǵan deıin Qasym-Jomart Toqaev elimizde demografııalyq úderisterdi taldaý jáne boljaý ortalyǵyn qurý qajettigi týraly bastama kóterdi.