Jurtymyz memleketti basqarýdyń burynǵy tásilin qaıtarýǵa jol bermeıtinine senimim mol – Prezıdent

Reformalardan keıin ótkenge qaıta oralmaımyz. Bul týraly Aqordada Respýblıka kúnine oraı birqatar azamatqa memlekettik nagradalar men syılyqtar tapsyrýǵa arnalǵan saltanatty rásimde Memleket basshysy Qasym-Jomart Toqaev aıtty, dep habarlaıdy Kazinform.

«Eki jylǵa da jetpeıtin az ýaqytta elimizde iske asyrylǵan reformalar halyqtyń saıası sana-sezimin edáýir ózgertti. Endi jurtymyz memleketti basqarýdyń burynǵy tásilin qaıtarýǵa jol bermeıtinine senimim mol. Reformalardan keıin ótkenge qaıta oralmaımyz. Ózgerister áli jalǵasady jáne memleketimizdiń sıpatyn tolyq ózgertedi. Biraq biz reformany júzege asyrǵanda, eń aldymen, ishki saıası turaqtylyqtyń mańyzdylyǵyn esten shyǵarmaýymyz kerek. Áıtpese Qazaqstannyń memlekettiligine zor qaýip-qater tónýi jáne onyń saldary ult bolashaǵy úshin óte aýyr bolýy múmkin», - dedi Prezıdent.

Qasym-Jomart Toqaev sondyqtan árbir azamat zań men tártipti saqtaýy kerek dep únemi aıtyp júrgenin eske saldy.

«Biz sózben de, ispen de qoǵamdy ortaq maqsatqa jumyldyrýǵa jáne jalpyulttyq birlikti nyǵaıta berýge tıispiz. Halqymyz azat el bolyp, myqty ári ádiletti memleket qurý týraly armanyn bereke-birliginiń arqasynda ǵasyrlar tezinen aman alyp shyǵyp, aqıqatqa aınaldyrdy», - dedi Memleket basshysy.