Jurt sheteldik kólikterdi qalaı zańdastyratynyn bilmeı, áýre-sarsańǵa túsip júr - Toqaev

ASTANA. QazAqparat – Búgin Úkimettiń keńeıtilgen otyrysynda Qasym-Jomart Toqaev sheteldik kólikterdi zańdastyrý jumystarynyń barysyn synady, dep habarlaıdy QazAqparat.

«Biz shetelden ákelingen avtokólikterdi zańdastyrý týraly sheshim qabyldadyq. Alaıda Úkimet aqparattyq jumysty durys júrgizgen joq. Sonyń kesirinen, jurt bul naýqan qalaı júrgiziletinin bilmeı, áýre-sarsańǵa túsip júr. Naqty qandaı kólikterdi zańdastyrýǵa bolatynynan da habarsyz»,-dedi Prezıdent.

Memleket basshysy mundaı mańyzdy málimetter azamattarǵa qoljetimdi bolýǵa tıis jáne ony senimdi aqparat kózderinen alýy qajet ekenin atap ótti.

«Eldi alańdatyp, dúrbeleń týǵyzbaý úshin Úkimet munyń bárin turaqty túrde halyqqa qarapaıym tilmen túsindirip otyrýy kerek»,-dedi Qasym-Jomart Toqaev.