Jurt óńirdegi bılikten qarapaıym máselege túsinikteme ala almaı, Elordaǵa júginip jatady – Toqaev
ASTANA. KAZINFORM – Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda barlyq deńgeıdegi bılik ókilderi halyqpen ashyq ári túsinikti áńgime, suhbat ornata bilýi kerek ekenin aıtty.
– Shaǵymdanatyn azamattardyń arasynda túrli adam bolady, bul – belgili nárse. Desek te, shyn máninde, muqtaj adamdar az emes, olarǵa qolǵabys etýimiz kerek. Búginde ortalyqqa aımaqtardan joldanatyn aryz-shaǵymdar kóbeıip ketti. Bul másele týraly men Joldaýymda aıtyp óttim. Byltyr Prezıdent Ákimshiligine shamamen 83 myń ótinish kelip túsken. Bul – aldyńǵy jylmen salystyrǵanda 30 paıyzǵa kóp. Shaǵymdardyń basym bóligin jergilikti deńgeıde qarap, der kezinde sheshýge bolatyn edi. Eshkim de múlde múmkin emes máseleni aıtpaıtyny belgili. Ashyǵyn aıtqanda, jurt óńirdegi bılikten eń qarapaıym degen máselelerge qatysty túsinikteme ala almaıdy. Sodan soń azamattar elordaǵa hat joldap, tikeleı Prezıdentke júginip jatady. Shyn mánisinde, olardyń arasynda únemi aryz jazatyn «kásibı» shaǵymdanýshylar bar, biraq kóbi óz muń-muqtajyn aıtyp, Aqordaǵa shaǵymdanýǵa májbúr, - dedi Prezıdent.
Máslıhat depýtattary halyq pen bılik arasyndaǵy kópir bolýǵa tıis ekenin atap ótti.
– Máslıhat depýtattary halyq pen bılik arasyndaǵy kópir bolýǵa tıis. Olar turǵyndardyń máselesin sheshýge kómektesýi kerek. Osy mańyzdy jumysqa olardyń quzyreti tolyq jetedi. Byltyr oblystyq deńgeıde atqarýshy organdarǵa 6 myńǵa jýyq depýtattyq saýal joldandy. Biraq onyń sany emes, sapasy mańyzdyraq, ıaǵnı, máslıhattar osy múmkindikti tıimdi paıdalanýǵa tıis. Túptep kelgende, aımaqtardyń damýy, turmys sapasynyń jaqsarýy, jurttyń bılikke zor senimmen qaraýy Sizderdiń qyzmetterińizge tikeleı baılanysty. Osyny árdaıym basty nazarda ustaǵan jón, - dedi Memleket basshysy.
Prezıdent máslıhattardyń ókilettigin odan ári keńeıtip, naqtylaı túsý qajet ekenin aıtty.
