«Júrsinniń júırikteri» jańa formatta aıtystyń kórkin qyzdyrady - Erlan Qarın
ASTANA. QazAqparat - «Qazaqstan» telearnasynda kóktemde «Júrsinniń júırikteri» atty aqyndar aıtysy bastalmaq. Bul týraly «Qazmedıa» ortalyǵynda «Qazaqstan» RTRK» AQ basqarma tóraǵasy Erlan Qarın aıtty, dep habarlaıdy «QazAqparat» HAA tilshisi.
«Kóktemgi maýsymda daıyndap otyrǵan birneshe qyzyqty jobalar bar. Olar ár túrli janrda bolady. «Men qazaqpyn» sekildi úlken jobalardyń biri - «Júrsinniń júırikteri» bolmaq. Bul jobany ótken jyldan beri josparladyq. Bas tóreshisi Júrsin Erman bolady. Aıtys ár jeksenbi saıyn keshki saǵat toǵyzda bastalady», - dedi Erlan Qarın Qazaqstan» ulttyq telearnasynyń aldaǵy jobalary týraly aıtqan sózinde.
Onyń aıtýynsha, aıtysqa elimizge belgili jıyrma shaqty aqyn qatysady. Aıtys shilde aıynyń basyna deıin jalǵaspaq. Aıtys ulttyq naqyshty saqtaı otyryp, jańa formatta usynylady.
«Júrsinniń júırikteri» baǵdarlamasynyń qazylar alqasynyń múshesinde belgili óner qaıratkerleri: qazaq kınosynyń maıtalmany, QR Halyq ártisi Asanáli Áshimov, ánshi ári kompozıtor, QR Halyq ártisi Altynbek Qorazbaev, professor, ǵylym doktory Namazaly Omashev pen Halyq aqyny Ásııa Berkenova bolmaq. Al jobanyń basty qonaǵy QR eńbek sińirgen qaıratkeri, aqyn ári jýrnalıst Júrsin Erman saıys arasynda pikirin aıtyp otyratyn bolady.
