Júrsin Erman Baıanaýyl aýdanynyń qurmetti azamaty atandy
ASTANA. QazAqparat - Halyqaralyq jyrshy termeshiler odaǵynyń tóraǵasy, «Alash» ádebı syılyǵynyń ıegeri Júrsin Erman Baıanaýyl aýdanynyń qurmetti azamaty atandy, dep habarlaıdy pavlodarnews.kz .
Pavlodar oblysynyń Baıanaýyl aýdanynda Jumat Shanınniń 125 jyldyǵyna arnalǵan respýblıkalyq aqyndar aıtysy ótti
Aıtys shymyldyǵyn aýdan ákimi Orazgeldi Qaıyrgeldınov ashyp, QazaqKSR-niń halyq ártisi, qazaq teatrynyń negizin salýshy Jumat Turǵynbaıuly Shanınniń mereıtoıymen quttyqtady. Sonymen qatar, aýdan basshysy aqyn Júrsin Ermanǵa «Baıanaýyl aýdanynyń qurmetti azamaty» tósbelgisin saltanatty túrde tabys etti.
Sondaı-aq, dál osyndaı ataq Qazaqstannyń Eńbek Eri, Qazaqstannyń halyq ártisi Asanáli Áshimovke jáne osy aýdannyń áleýmettik-ekonomıkalyq, aýyl sharýashylyǵy jáne bilim berý salasynyń damýyna eleýli úles qosyp júrgen birqatar azamattarǵa berildi.
Aıtysqa Qazaqstannyń túkpir-túkpirinen kelgen 16 aqyn qatysty. Atap aıtar bolsaq, Arqalyqtan Aıbek Qalıev, Almatydan Rústem Qaıyrtaıuly men Shuǵaıyp Sezimhan, Astanadan Erkebulan Qaınazar men Ásem Erejeqyzy, Qaraǵandydan Maqsat Aqanov pen Dıdar Qamıev, Qyzylodardan Meıirbek Sultanhan, Shymkentten Qalıjan Bildásh pen Dáýren Aqsaqalov, Pavlodar oblysynan Aspanbek Shuǵataev, Qýanyshbek Sharmanov, Nurqanat Qaırat, Ońǵar Qabdenov, Tilek Seıitov, Máres Baıron keldi.
Aıtystyń qorytyndysy boıynsha Jumat Shanın atyndaǵy arnaıy júldege Arqalyqtan kelgen arqaly aqyn Aıbek Qalıev laıyq dep tanyldy. Al, úshinshi oryn eki aqynǵa berildi. Olar - qaraǵandylyq Dıdar Qamıev pen astanalyq Erkebulan Qaınazar. Astanadan kelgen Ásem Erejeqyzyna ekinshi júlde buıyrdy. Al, Baıanaýyl aýdanynyń namysyn qorǵaǵan Aspanbek Shuǵataevqa birinshi oryn buıyrsa, aıtystyń bas júldesin jáne 1,5 mıllıon aqshalaı syılyqty Qaraǵandy oblysynan kelgen Maqsat Aqanov jeńip aldy.
