Júrsin Erman balalar fılmine tústi
ALMATY. 29 tamyz. QazAqparat - Men munda bóten bireýdiń rólin oınaǵam joq. Ony búgin kınoteatrlarda jalpy jurtshylyqtyń nazaryna usynylatyn «Ańshy bala» fılminiń bas keıipkerleriniń birin somdaǵan Júrsin Erman týyndynyń BAQ ókilderine kórsetilimi kezinde aıtty.
«Kastıng boldy. Oǵan Asanáli Áshimov sııaqty áıgili kıno jáne teatr akterlerimen birge qatysqanbyz. Stsenarıı avtory jańa beıne bolsyn dep meni tańdady. Ózim de aýylda týra osyndaı shaldyń qolynda óstim. Dál osyndaı ańshy ákem boldy. Bul fılm meniń aýyldyń turmysyna degen saǵynyshymdy jańǵyrtyp otyr. Men de qaladan aýylǵa qydyryp kelip, qasqyr atyp alǵan Qambar sııaqty, 7-inshi synypta oqyp júrip kókem joqta týra osylaı qasqyr atyp alǵam», - dedi J.Erman.
Aıtys óneriniń nasıhatalýyna óz úlesin qosyp, úlken janashyry bolyp júrgen Júrsin Ermannyń bul kıno ónerindegi alǵashqy róli bolyp otyr. Óziniń aıtýynsha, munda ol kózimen kórip, kóńiline ábden sińisti bolǵan atasynyń ómirin somdap otyr. Stsenarııi de kóńilinen shyqqanyn jáne rejısserler de aýyldaǵy tabıǵı ómirdi birshama sátti kórsete alǵanyn erekshe atap kórsetti. Bul jetkinshek jas balalarǵa arnalǵan sátti shyqqan fılmderdiń biri deýge negiz bar. Oǵan kınony kórgen kezde kórermenniń de kózi tolyq jetetin bolady.
