Júrip bara jatqan kólikte tort ázirlegen túrkistandyq áıel men onyń jubaıy jaýapqa tartyldy
TÚRKІSTAN. KAZINFORM – Túrkistan oblysynyń Saryaǵash aýdanynda jol ústinde qaýipti vıdeo túsirgen erli-zaıypty jazalandy.
Áleýmettik jelide qozǵalystaǵy kóliktiń lıýginen denesin shyǵaryp, tort ázirlegen áıeldiń vıdeosy tarady.
Beınejazba polıtsııanyń nazaryna ilinip, tártip saqshylary KIA Ceed avtokóligin jáne onyń júrgizýshisin jedel anyqtady. Tekserý barysynda kólikti 36 jastaǵy er adam basqarǵany, al onyń 35 jastaǵy jubaıy lıýkten shyǵyp, tort ázirlegeni belgili boldy.
– Jol qozǵalysy qaýipsizdigi talaptaryn buzǵan erli-zaıyptyǵa qatysty tıisti ákimshilik sharalar qabyldandy, – delingen Túrkistan oblysy polıtsııa deapartamentiniń habarlamasynda.
Vedomstvo áleýmettik jelige kontent túsirý kezinde jol qaýipsizdigi talaptaryn saqtaýǵa shaqyrdy.
– Áserli kadr túsirý úshin jasalǵan mundaı qaýipti áreketter adam ómirine qaýip tóndirip, qaıǵyly jaǵdaıǵa ákelýi múmkin, – dep eskertti polıtsııa.
Buǵan deıin Túrkistan oblysynda joldyń dál ortasynda kólik qozǵalysyna kedergi keltirgen jigittiń vıdeosy áleýmettik jelide taraǵan edi.
