Jýrnalıstıkaǵa bólinetin grant eki ese kóbeıedi
ASTANA. 2 aqpan. QazAqparat - Keshe Bilim jáne ǵylym mınıstri Baqytjan Jumaǵulov Elbasy Joldaýynda kóterilgen máselelerdi tarqatyp aıtý úshin eń aldymen Lev Gýmılev atyndaǵy Eýrazııa ulttyq ýnıversıtetine keldi.
Jıynda qazaqstandyq bilim men ǵylym júıesinde qordalanyp qalǵan kúrdeli máseleler ortaǵa salynyp, otandyq bilim men ǵylym salasyna erekshe nazar aýdaryldy. Sonyń biri de biregeıi jýrnalıstıka mamandyǵyndaǵy máseleler.
Bul týraly L.Gýmılev atyndaǵy Eýrazııa ulttyq ýnıversıtetiniń baspasóz ortalyǵy habarlap otyr.
Jýrnalıstıkaǵa bólinetin grantty ústimizdegi oqý jylynda kóbeıtý týraly ýádege túrtki bolǵan EUÝ-dyń jýrnalıstıka jáne saıasattaný fakýltetiniń dekany, professor Namazaly Omashulynyń saýaly boldy.
Namazaly Omashev mınıstrdiń bilim men ǵylym salasyna jasap jatqan ıgi isterin aıta kele: «Osydan birneshe jyl buryn Qazaqstandaǵy buqaralyq aqparat quraldarynyń sany 100-ge jetpeıtin ýaqytta, respýblıka boıynsha jýrnalıstıka mamandyǵyna qazaq jáne orys bólimin qosqanda 100 oryn grant bólinetin. Elimiz táýelsizdik alyp, álemde aqparattyń aldyńǵy qatarǵa shyqqan zamanynda BAQ sany Qazaqstanda 2,5 myńnan asyp otyr. Oǵan agenttikterde jumys jasaıtyn baspasóz hatshylaryn qosyńyz. Al respýblıkamyzda jýrnalıstıka mamandaryn daıarlaıtyn 27 oqý orny bar. Byltyr mınıstrlikten jýrnalıstıkaǵa grant bar-joǵy qazaq bólimine 35, orys bólimine 25 oryn bólindi. Bul degenińiz ár oqý ornyna bir-birden ǵana grant tıesili degen sóz. Bıyl fakýltetimizge tıisti 100 balldy tolyq alǵan abıtýrıentter oqýǵa túspeı qaldy. Ornyna «Altyn belgi» ıegerleri men arnaıy kvotasy bar stýdentter tústi. Osy máseleniń sheshimin tabarsyz dep úmittenemin» degen sózine, mınıstr Baqytjan Tursynuly onyń jýrnalıstıka salasyndaǵy bilikti de bilgir maman ekendigin kópshilik aldynda aıta kele, qoıǵan suraǵyna oraı jaýap berdi.
Іle-shala Baqytjan Tursynuly minbede turyp, Joǵary jáne joǵary oqý ornynan keıingi bilim departamentiniń dırektory Serik Máýlenulyna: «Aldaǵy ýaqytta jýrnalıstıka mamandaryn daıarlaıtyn oqý orny tek Astanadaǵy Lev Gýmılev atyndaǵy Eýrazııa ulttyq ýnıversıteti men Almatyda ál-Farabı atyndaǵy Qazaq ulttyq ýnıversıteti bolýy kerek. Ózge qalalardaǵy jýrnalıstıka daıarlaıtyn bólimsheler ózderiniń jýrnalıst mamandaryn daıarlaýǵa múmkinshilikteri bar ekendigin dáleldeı alsa, jumystaryn ary qaraı jalǵastyrsyn, al básekege qabilettilik tanyta almaǵandarynan jýrnalıstıka mamandaryn daıarlaý týraly lıtsenzııalaryn alyp tastaý» týraly tapsyrma berdi.
Sátin salsa, ústimizdegi jyldan bastap jýrnalıstıkaǵa qarymy jetse de, qaltasy kótermeı kelgen talantty jastarǵa jol ashylmaq.
