Jýrnalıstıka jáne JI: Prezıdent teleradıokesheniniń jobalary Sankt-Peterbýrgtegi medıaforýmda tanystyryldy
ASTANA. KAZINFORM — III Qazaqstan–Reseı medıaforýmy aıasynda ótken «Jasandy ıntellekt pen jalǵan aqparat dáýirindegi jýrnalıstıkanyń keleshegi men syn-qaterleri» atty paneldik sessııada «Jibek Joly/Silk Way» telearnasynyń basqarýshy dırektory Erkejan Kúntýǵan kontent óndirýdiń zamanaýı tásilderi men QR Prezıdenti teleradıokesheniniń halyqaralyq aqparattyq keńistiktegi qamtý aıasyn keńeıtý baǵytyndaǵy jobalary týraly baıandady.
Erkejan Kúntýǵan óz sózinde tsıfrlyq tehnologııalardyń kómegimen júzege asyrylǵan birqatar tabysty jobalarǵa toqtaldy. Solardyń alǵashqysy — QR Prezıdenti teleradıokesheni men China Media Group birlesip iske asyrǵan Silk Way Star halyqaralyq mýzykalyq jobasy. Bul joba álem boıynsha 1 mıllıardtan astam qaralym jınady. Bıyl atalǵan mýzykalyq shoýdyń ekinshi maýsymyn China Media Group júzege asyryp jatyr. Túsirilimder Qytaıdyń Iý qalasynda ótip jatyr.
Onyń aıtýynsha, jasandy ıntellekt quraldary búginde kontentti ártúrli tilderge aýdarý, jergiliktendirý jáne dybystaý jumystarynda keńinen qoldanylady. Qazaqstandyq jáne qytaılyq jasandy ıntellekt platformalary osy mindetterge beıimdelgen. Sonyń nátıjesinde kontent óndirisi edáýir jedeldep, halyqaralyq aýdıtorııaǵa arnalǵan materıaldardyń sapasy artyp, olardy alty tilde usynýǵa múmkindik berilip otyr.
Forým barysynda tanystyrylǵan taǵy bir aýqymdy joba — qazirgi ýaqytta Astanada ótip jatqan «Bolashaq oıyndary». QR Prezıdenti teleradıokesheniniń tehnıkalyq toby halyqaralyq aýdıtorııa úshin jarystardy birden tórt iri sport arenasynda teletúsirilimmen qamtamasyz etýde. Sonymen qatar efırdi bezendirýde jasandy ıntellekt tehnologııalary men AI-grafıka keńinen qoldanylyp otyr.
Erkejan Kúntýǵan «Bolashaq oıyndarynyń» translıatsııasyn álemniń 118 elindegi kórermenge jetkizýge qosqan úlesi úshin «Gazprom-Medıa» men «Gazprom ǵaryshtyq júıeleri» kompanııalaryna alǵysyn bildirdi.
Jasandy ıntellekt ınklıýzıvti jobalardy júzege asyrýda da tıimdi qoldanylyp keledi. Atap aıtqanda, qazaq tilindegi «Fıksıkter» balalar anımatsııalyq serıalyna estý qabileti buzylǵan kórermenderge arnalǵan sýrdoaýdarma jasalyp, «Masha men Aıý» mýltserıalynyń qazaq tilindegi ózindik dybystaý nusqasy ázirlendi.
Sondaı-aq Erkejan Kúntýǵan QR Prezıdenti teleradıokesheni qyzmetkerleriniń jasandy ıntellekt tehnologııalaryn meńgerýine erekshe kóńil bólinetinin aıtty. Onyń sózinshe, bul baǵytta halyqaralyq seriktestermen, sonyń ishinde Al Jazeera jáne China Media Group medıakompanııalarymen yntymaqtastyq ornatylǵan. Atalǵan uıymdardyń mamandary Astanada teleradıokeshen qyzmetkerlerine arnalǵan arnaıy oqytý trenıngterin ótkizgen.
— Tehnologııalar aqparatty jınaýdy, óndirýdi jáne túrli aýdıtorııaǵa beıimdeýdi áldeqaıda jyldamdatady. Alaıda qoǵamnyń senimi, aqparattyń shynaıylyǵyn tekserý, jýrnalıstik etıka men jaýapkershilik árdaıym adamnyń qolynda qalýy tıis, — dep túıindedi Erkejan Kúntýǵan.
