Jýrnalıstıka qoǵamdy damytýdyń negizgi ózegi - Djon Dıkson
ALMATY. 31 mamyr. QazAqparat /Erlik Erjanuly/ - Qazaqstannyń Menedjment, ekonomıka jáne boljaý ınstıtýty (QMEBI) bıylǵy jyldan bastap jańa medıa salasynda bilim alyp jatqan 10 stýdentke 10 grant bólmek.
Bul týraly "Minber" jýrnalısterdi qoldaý ortalyǵynyń 27-28 mamyr kúnderi Almatyda uıymdastyrǵan «Jańa medıa tehnologııalaryn qazaqtildi BAQ tájirıbesine engizý» dep atalatyn eki kúndik semınar-trenınginde aıtyldy.
QMEBI-diń áleýmettik ǵylymdar fakýltetiniń dekany, professory Djon Dıksonnyń aıtýynsha, jýrnalıstıka qoǵamdyq ómirdi damytýdyń negizgi ózegi. Sondyqtan olar bıyl 2-ret EQYU, Soros Qazaqstan qory men «Minber» jýrnalısterdi qoldaý ortalyǵymen birlesip osy sharany ótkizýge atsalysýda. Oǵan bıyl Almaty, Shymkent, Qyzylorda, Aqtaý, Atyraý, Taraz, Taldyqorǵan, Semeı, Óskemen, Aqtóbe qalalarynan 30-ǵa jýyq adam qatysty.
"Semınardyń taqyryby óte ózekti. Búgingideı tehnologııa damyǵan zamanda jańa medıanyń alatyn orny erekshe. Alaıda qazaq tildi jýrnalıster arasynda bul salanyń damýy kenje qalyp otyr. Sol sebepti de, bizdiń Ortalyq byltyr Almaty qalasynda osyndaı semınardyń ótýine qoldaý kórsetken edik. Semınar óte tabysty boldy, ári mundaı bastamalardy qoldaýdyń qajettigin kórsetti. Ol qazaq tildi BAQ-tyń tanylýyna óz septigin tıgizedi dep oılaımyz», - deıdi EQYU-nyń Astanadaǵy ortalyǵynyń Adam quqyǵy máseleleri jáne zań ústemdigi jónindegi keńesshisi Shtefan Býhmaıer.
Al Soros Qazaqstan qorynyń "BAQ-ty qoldaý" baǵdarlamasynyń úılestirýshisi Darııa Tsyrenjapovanyń sózine qaraǵanda, «Minberdiń» bul jobasy bıyl ınternetti damytý jáne ony yntalandyrý baıqaýy aıasynda qoldaý taýyp otyr. Baıqaýǵa túsken 24 ótinishtiń tórteýi jeńimpaz dep tanyldy. «Minberdiń» jýrnalısterdi jańa medıa tehnologııasyna úıretýge baǵyttalǵan bastamasy arqasynda byltyr qazaq tilinde 87 blog ashyldy. Bul úrdis bıyl da óz jalǵasyn taýyp, alǵashqy 23 kúnniń ishinde jańadan 30-ǵa jýyq blog ashylyp otyr. Aldaǵy ýaqytta onyń sany budan ári óse bermek.
