Jýrnalıstik baıqaý eldegi áleýmettik saıasatty qandaı baǵytta damytý kerektigi týraly tyń oılar saldy
ASTANA. Qazannyń 6-sy. QazAqparat /Jasulan Amanbaıuly/ - Jýrnalıstik baıqaý eldegi áleýmettik saıasatty qandaı baǵytta damytý kerektigi týraly tyń oılar saldy. Qazaqstanda múgedekterdiń quqyqtaryn júzege asyrý taqyrybyndaǵy eń úzdik materıaldarǵa ótken respýblıkalyq baıqaýǵa Eńbek jáne halyqty áleýmettik qorǵaý vıtse-mınıstri Ásel Núsipova osyndaı baǵa berdi.
Baıqaý BUU Damý baǵdarlamasynyń jáne Eńbek jáne halyqty áleýmettik qorǵaý mınıstrliginiń bastamasymen, Qazaqstan Jýrnalıster odaǵynyń atsalysýymen mamyr aıynda jarııa etilgen bolatyn.
Búgin qorytyndysy jasalǵan baspasóz máslıhatynda respýblıkalyq merzimdi BAQ-ta jarııalanǵan qazaq jáne orys tilindegi úzdik dep tanylǵan 6 maqalanyń avtorlaryna aqshalaı syılyqtar tabystaldy.
«Baıqaýǵa kelip túsken maqalalardyń ishinde múgedekter qataryndaǵy balalardyń, áıelder men sportshylardyń túrli ómirlik qıyndyqtary men ózekti problemalaryn sheberlikpen kórsete alǵan materıaldar kóp boldy. Jýrnalıstik jumystar qoǵamdy ǵana emes, quzyrly organ retinde bizdiń de kóńilimizdi aýdartyp, eldegi zańnamany, áleýmettik saıasatty qandaı baǵytta damytý kerek ekenimizge jańa oılar saldy», deıdi Eńbek jáne halyqty áleýmettik qorǵaý vıtse-mınıstri Ásel Núsipova.
Onyń aıtýynsha, jańa pikirler men usynystardyń BAQ-ta jarııalanýy «Múgedekter quqyǵy týraly» halyqaralyq konventsııany ratıfıkatsııalaýǵa arnalǵan ulttyq jospardy jasaqtaý ústinde júrgen mınıstrlik úshin óte ózekti.
Jeńimpaz retinde Soltústik Qazaqstan oblysynyń «Esil óńiri», Aqtóbe qalasynyń «Dıapazon», Astana qalasynyń «Zań» gazetteri, Qostanaıdyń «Qostanaı», Atyraýdyń «Prıkaspııskaıa kommýna» jáne «Túrkistan» gazetteri tilshileriniń attary ataldy.
Elimizde qazan aıynyń ekinshi jeksenbisi Múgedekter kúni dep belgilengen. Bul kún qoǵamdy, memlekettik organdardy, halyqaralyq qaýymdastyqty múmkindigi shekteýli jandardyń problemasyna nazar aýdartý jáne múgedekterdi ómirdiń barlyq salalaryna yqpaldasýyna jaǵdaı jasaý úshin atalyp ótiledi. Resmı derekter boıynsha, Qazaqstan halqynyń 3 paıyzy múgedekter sanatyna jatady. 2008 jylǵy arnaıy áleýmettik qyzmetter týraly zańnyn aıasynda múgedekterge kórsetiletin qyzmetterdi damytýǵa 3 jyl merzimge 30 mlrd. teńge bólingen.
