Jýrnalısterge mártebe berip, turǵyn úı kezegine qoıa almaımyz – depýtat

ASTANA. QazAqparat – Májilis depýtaty Elnur Beısenbaev BAQ ókilderine mártebe berip, turǵyn úı kezegine qoıýdyń múmkin emestigin aıtty, dep habarlaıdy QazAqparat tilshisi.

«Jýrnalısterge qatysty bir shyndyqtyń betin ashyp alaıyq. Jańa ázirlengen zańnamanyń aıasynda BAQ ókilderin arnaıy bir turǵyn úı baǵdarlamasy arqyly kezekke qoıý, mártebe berýdi turǵyn úı týraly zańnamaǵa engize almaımyz. «Mass-medıa» týraly zań Parlamenttiń qaraýyna engennen keıin jýrnalıster depýtattardan áleýmettik máseleler boıynsha kóp nárse kútpeýi qajet», - dedi Elnur Beısenbaev Májiliste «Mass-medıa» týraly zań jobasyn talqylaý barysynda.

Sondaı-aq, halyq qalaýlysy atalǵan máseleni sheshý boıynsha óz usynysyn alǵa tartty.

«Mınıstrlik qazirden bastap «Otbasy bank» jáne ekinshi deńgeıli basqa da banktermen kelisim júrgizýi kerek. Turǵyn úı máselesin sheshýdiń joldaryn birlesip qarastyrǵan jón. Bizdi qazir qarap, tyńdap otyrǵan jýrnalıster oılamaýy qajet, biz olardy bir kúnde kategorııaǵa engizemiz dep. Óıtkeni, ár mamandyqty kategorııaǵa engizý múmkin emes. Búginde 650 myńnan astam azamat baspana kezeginde tur. Jyl saıyn turǵyn úı kezegine turatyn azamattardyń sany 40-50 myń aralyǵynda ósip otyrady. Sondyqtan bul másele «Mass-medıa» týraly zańnyń aıasynda sheshilmeıdi», - deıdi depýtat.